(කරන්දෙණිය එම්. සුසිල් ප්‍රියන්ත) 
හීන් අඩියකට පුරුදුවී සිටින සැමියා ඉන් මුදාගැනීමට තමා ඕනෑම කැපවීමක් කරන්න ලැහැස්ති යයි පැවසූ භාර්යාවකට සැමියා ඉල්ලූ කැපවීම කර ගන්නට නොහැකිව ඇය අලි අමාරුවක වැටුණු පුවතක් රූකඩවලට ප්‍රසිද්ධ නගරයකින් අසන්නට ලැබේ. 

හේ හිත හොඳ තරුණ ව්‍යාපාරිකයෙකි. ඒ නිසාම ඔහුට හතර වටේම මිතුරෝ සිටියහ. මිතුරන් සමග දවසක් හැර දවසක් හෝ දවස් දෙක තුනකට වරක් ඔහු හීන් අඩියක් ගැසුවේය. මේ හීන් අඩිය නිසා සිය සැමියා රෝගී වේ යයි බිය උපදවා ගත් ඔහුගේ භාර්යාව ඔහු ඉන් මුදාගැනීමට උත්සාහ කළාය. ඒ වරක් දෙවරක් නොව කිහිපවරකි. 

ඉකුත් දිනෙක දෙදෙනා නිවාඩු පාඩුවේ ඉන්නා අවස්ථාවක ඇය ඔහු අමතා කීවේ ඔය යාළුවොත් එක්ක අඩි පුඩි ගහන එක නතර කරනවා නම් තමා ඒ වෙනුවෙන් ඕනෑම කැපවීමක් කරන බවය. 

සිය භාර්යාවගේ මේ වදන් ඇසූ ඔහු අනේ ඔයා මට තියෙන ආදරේටනේ මම බොන එක නතර කරන්න හදන්නේ. මගේ සෞඛ්‍ය ආරක්ෂා කරන්නනේ ඔහොම කරන්නේ, මටත් ඕනෑ මේකෙන් ගැලවෙන්න තමයි. එහෙනම් ඔයා මම කියන කැපවීම කළොත් මම අද ඉඳලාම ඒකෙන් වැළකෙනවා යයි කීවේය. 

මගේ හොඳ මහත්තයා යැයි කී ඇය වටපිට බලා ඔහුගේ හිස සිඹගත්තේ මහත්වූ ආදරයකින් හා ඔයා දැන් කියන්න මම ඒ වෙනුවෙන් කරන්න ඕන මොන කැපවීමද කියලා යයි ඇය තොඳොල් බසින් ඔහුට කීවාය. 

‘නෝනා මගේ බීම නවත්වන්න හදන්නේ ඇඟට හොඳ නැති නිසානේ. ඔයා රෑ හතේ ඉඳන් රෑ දහය වෙනකම් රූපවාහිනිය ඉස්සරහ ඉඳගෙන ඇහැ පියන්නේ නැතුව හින්දි බලන්න වහ වැටෙන එක මනසට හොඳ නැහැ. ඒ නාට්‍යවලින් මනස ලෙඩ වෙනවා. ඒ වෙලාවෙ අපි දෙන්නා නිදහසේ සැටියට වෙලා කතා කර කර ඉමු යයි ඔහු යෝජනා කළේය. ඒ කැපවීම කරනවා නම් මම මගේ බීමත් නතර කරනවා යැයි ඔහු වැඩිදුරටත් කීවේය. 

හින්දි නාට්‍යවලට ඇබ්බැහි වෙලා සිටි ඇයට ඒ කැපවීම කිරීමට නොහැකි නිසාම ඔහු වෙනදාමෙන් සිය මිතුරන් සමග හීන් අඩිය දාන අතර ඔහුගේ භාර්යාවද වෙනදා මෙන් රාත්‍රී හතේ සිට රාත්‍රී දහය දක්වා හින්දි නාට්‍ය නරඹමින් සිටින්නීය. හීන් අඩිය දාන්න එපා යයි කියමින් භාර්යාව කළ කරදර කිරීමද එදා සිට නතර වූයේ දෙන්නාම ඇබ්බැහි වූ ක්‍රියාදාමයන් දෙකම දෙන්නාටම නතර කර ගැනීමට නොහැකි බව පසක් කරමිනි.