කරන්දෙණිය එම්. සුසිල් ප්‍රියන්ත
වැල්ලේදී සුද්දියකගෙන් අපරදිග ක්‍රමයට  ලැබුණු ආචාර සමාචාරවලට ගෙදරදී භාර්යාවගෙන් පෙරදිග ක්‍රමයට කොසු උත්තමාචාරයක් ලැබූ තැනැත්තකු පිළිබඳව දකුණු මුහුදු බඩ තීරයේ ගමකින් අසන්නට ලැබේ.
ඇය එංගලන්තයේ සුදු කතකි. නිවාඩුවට ලංකාවට ආවේ ඊයේ පෙරේදාය. ඇය දකුණු වෙරළට ගියේ ඇවිදින්නටය. සුන්දර වෙරළ තීරය අසුන්දර වී තිබෙනු දුටු ඇයගේ පපුව පත්තුවිය. වැල්ල පිරිසුදු කිරීමට ශ්‍රමදානයක් සංවිධානය කළේ මේ වෙනුවෙන් තමන්ට කළ හැකි දේ කිරීමටය.
සුදු අය මෙන්ම අපේ අයගේ සහභාගීත්වයෙන් වැල්ල පිරිසුදු කිරීමේ ශ්‍රමදානය පැවැතියේ අපගේ මිතුරාද ඒ අතරය. ඔහු කැපීපෙනෙන්නත් එක්කම තමන් රැගෙන ආ මිතුරන් සමග හරි හරියට වැල්ල ශුද්ධ පවිත්‍ර කිරීමේ කාර්යයේ යෙදී සිටියේය. මේ වෙනුවෙන් සුදු කතගෙන් ඔහුට යහමින් ලකුණු වැටුණේය.
වැල්ල පිරිසුදු කිරීමේ ශ්‍රමදානය නිමාවට පත්විය. වැල්ල ශුද්ධ පවිත්‍ර කිරීමට තමාට ඇඟෙන්ම සහයෝගය දුන් අයට ඇය සමුදුන්නේ සිප වැළඳ ගැනීමෙන් අනතුරුවය. වැඩිය වැඩ කළ ඔහුට ද එය එසේමය. ජීවිතේ කවදාවත්ම සුදු කතකගේ ස්පර්ෂයක් නොලද ඔහු මේ සිප වැළඳ ගැනීමෙන් උද්දාමයට පත් වී සිටියේය.

නිවසට ගොඩවූයේ ද ඒ සතුටෙනි. සතුට පිට වූයේ ආශා කරන ගීයක පදවැල් කිහිපයක් මුමුණමිනි. ඒ සමගම ඔහු එනතෙක් දොරමුල්ලේ රැකවලේ සිටි භාර්යාවගෙන් කොසු පහරවල් කිහිපයක් වැදුණේ හෙණ ගෙඩි පාත් වෙන්නාක් මෙනි.
කිසිවක් සිතා ගැනීමට නොහැකිවුණ මේ ගෑනිට අද මේ මොකද වෙලා තියෙන්නේ යැයි යටිගිරියෙන් කෑගැසුවේ ඊළඟ පාර ගැසූ කොසු පහර වළකාලමිනි.
වලත්ත මිනිහා අද තමුසේ උදේ සුද්දියෙක් බදාගෙන කොහේද වැල්ලේ හිටියේ? යැයි ඇය ඇසූවිට ඔහුට උතුර දකුණ අමතක විය.
වැල්ලේදී සුදු කත තමාට සිප වැලඳ කළ ආචාර සමාචාරයේ ගත් පින්තූරයක් මිතුරකු තමාගේ භාර්යාවගේ ජංගම දුරකතනයට වට්ස්ඇප් මාර්ගයෙන් එවා ඇති බව ඔහු දැනගත්තේ ඉන් පසුවය. භාර්යාව ඔහුට කොසු උත්තමාචාරයෙන් හොඳටම සලකා හමාර වී තිබිණි.