හේවාහැට-එම්.දසනායක

ශරීර ශක්තිය වැඩි කරගැනීමට ඇති ඖෂධ පානය කර දීර්ඝ කාලයක් තිස්සේ පැවැති දත් කැක්කුම සුව කරගත් වයෝවෘද්ධ ගොවි මහතකු පිළිබඳව පුවතක් පාතහේවාහැට ප්‍රදේශයේ ගම්මානයකින් වාර්තා වේ.
සිද්ධියට මුහුණ දුන් ගොවි මහතා ජීවිතයේ සැඳෑ සමය ගෙවමින් සිටින අයෙකි. වයෝවෘද්ධ වුවද තවමත් ඔහු කැත්තේ උදැල්ලේ වැඩටද රුසියෙකි. සිය සම වයසේ මිතුරන් සමග දිනපතාම මල් පැන් වඩියක රස බැලීමද ඔහුගේ දින චර්යාවේ කොටසකි.
මෙසේ සවස් යාමයේ මිතුරන් සමග කාලය ගත කරන අතරතුර ඔහු තම සිතේ සඟවාගෙන සිටි ශරීර ශක්තිය වැඩි කරගැනීමට ඇති ඔසුව මිලදී ගැනීමේ අදහස මිතුරන්ට පවසා ඇත. අදාළ ඖෂධ වර්ගය නගරයේ ඇති ඔසුහලේ ඇති බවත් එම ඖෂධ වර්ගය අධික මිලකින් යුතු බවත් පවසා ඇති මිතුරන් තමන් කිසිවකුට ඔසු හලෙන් එම ඖෂධය මිලදී ගැනීම ලැජ්ජා සහගත කරුණක් නිසා ඒ සඳහා උපක්‍රමයක් කල්පනා කර තිබේ.

පසුව ඒ සඳහා මුදල් ගෙවා අතරමැදියකු තෝරාගෙන එම ඖෂධය අතරමැදියා ලවා ඔසුහලෙන් මිලදී ගැනීමට තීරණය කර තැබෑරුම අසලදී මේ පිළිබඳව එම පුද්ගලයාට පවසා ඇත. අතරමැදි ගාස්තුව ලෙස රුපියල් දහසක මුදලක් තමන්ට අවශ්‍ය බවත් ඖෂධය මිලදී ගැනීමට තවත් රුපියල් දහසක මුදලක්ද අවශ්‍ය බවත් පවසා එම මුදල් ලබාගෙන තව නොබෝ වේලාවකින් නගරයේදී තමන් හමුවෙන ලෙස පවසා අතරමැදියා පිටත්ව ගොස් ඇත.
ඔසුහලෙන් ඖෂධය මිලදීගත් පුද්ගලයාගෙන් එම ඖෂධය ලබාගත් ගොවි මහතා ඉක්මනින් නිවසට පිටත්ව ගොස් ඇත.
පසුදින ගොවි මහතා නගරයේදී මුණ ගැසුණු විට අතරමැදියා ඖෂධයේ ගුණ අගුණ විමසූවිට ගොවි මහතා පවසා ඇත්තේ කියලා වැඩක් නෑ මරු බෙහෙත අවුරුදු ගාණක් තිබ්බ දත් කැක්කුම නම් අඩුවුණා යනුවෙනි.
තමන් අතරමැදියාගේ ගැටයට හසුවූ බව ගොවි මහතා දැනගෙන ඇතත් ඔහු සමග කලකෝලාහල ඇති කරගැනීම තවත් ලැජ්ජාවට කරුණක් නිසා පාඩුව හා තරහ ඉවසාගෙන පිටව ගොස් ඇත.
ශක්තිය වැඩි කරගැනීමේ ඔසුව වෙනුවට දත් කැක්කුමට ලබාගන්නා ඔසුවක් මිලදීගෙන ගොවි මහතාට තමන් ලබාදුන් බව අතරමැදියා සිය මිතුරන්ට පැවසීම නිසා සියලු‍ දෙනාම මෙම රහස දැනගෙන ඇත.