වියලු‍ව වාර්තාකරු 
තමුන්ගේ නිසි වයස සඟවාගෙන තම ආයතන  ප්‍රධානියා මෙන්ම එකට වැඩ කරන සේවක පිරිසද අන්දවමින්  විශ්‍රාම යායුතු වයස ඉක්මවා වසරක පමණ කාලයක් සේවය කරමින් වැටුප් හා දීමනා ලබාගත්  සේවකයකු පිළිබඳව ඌව පළාතෙන් වාර්තාවේ.
ඔහු ඌව පළාතේ එක්තරා  ආයතනයක  සාමාන්‍ය සේවකයෙකි.
බොරු විශ්වාසයක් හා සුහදත්වයක් මවා පාමින් ඔහු ආයතන ප්‍රධානියාගේද සිත දිනාගෙන සේවය කළේ ආයතනයේ සෙසු සේවකයන් නොකළ වැරැදිවලට පවා වරදකරුවන්  කරමින් ආයතන ප්‍රධානියාට ගතු කේළම් පවසමිනි.
මේ හේතුව නිසාම ආයතන ප්‍රධානියා ද ඔහු කෙරෙහි අපමණ විශ්වාසයකින්  පසුවූයේ ඔහු පැවැසූ බොහෝ දේ සත්‍යයැයි වටහා ගනිමිනි.

කෙසේ වෙතත් නිසි විශ්‍රාම වයසට වඩා වසරක පමණ කාලයක් මොහු සේවය කොට ඇති බව ආයතන ප්‍රධානියාට  දැනගන්නට ලැබුණේ  සේවකයන්ගේ ලිපි ගොනු නඩත්තු කෙරෙන ප්‍රධාන කාර්යාලයේ ලිපිකාර මහත්මයෙකුගෙනි.
ඔහු විසින් කරනු ලැබූ දැනුම් දීමක් මත  අවසානයේ දී කලක් තිස්සේ තමුන් සමඟ ගැවසෙමින් තමුන් මුළා කළ පුද්ගලයාගේ ‍ප්‍රතිරූපය හඳුනාගන්නට ආයතන ප්‍රධානියාටද හැකිවිය.
කෙසේ වෙතත්  ඒ වන විටත් මොහු වසරක කාලයක් වැටුප පමණක් නොව අතිකාල දීමනා ඇතුළු සෙසු දීමනා ද ලබාගෙන තිබූ බව අනාවරණය විය. මේ වනවිටත් එම මුදල් යළි අයකරගෙන ඔහුට විනය පරීක්‍ෂණයක් පැවැත්වීමටද පියවර ගෙන ඇතැයි ආයතන සේවකයෝ පවසති.