මීරිගම විශේෂ පුෂ්පකුමාර මල්ලවආරච්චි
රුපියල් තුන්සියයකට මිල නියම කර තිබූ රේක්කය රුපියල් අනූවක් වැඩියෙන් මිල වැඩි කර විකිණීමට ගත් උත්සාහයක් කළගෙඩිහේනට නුදුරු ගමකින් වාර්තා විය.

එය කාන්තාවක විසින් කුඩා පරිමාණයෙන් පවත්වා ගෙන යනු ලබන ගොඩනැගිලි ද්‍රව්‍ය අලෙවි හලකි. වර්තමානයේ වගා කරන්නැයි නොයෙක් මාධ්‍යවලින් කළ දැනුවත් කිරීම නිසා එම ප්‍රදේශයේ තාත්තකු හා පුතකු එම කඩයට ගියේ රේක්කයක් මිල දී ගැනීමේ අටියෙනි. 

රේක්කයක මිල රුපියල් 300ක් බව ඔවුහු පෙරදින එම අලෙවිහලෙන් රේක්කයක් මිලදී ගත් පුද්ගලයකුගෙන් දැන ගෙන සිටියහ.
රේක්කයක් දෙන්නැයි කළ ඉල්ලීමට අනුව කඩයේ ඇතුළට පෑනක් ද රැගෙන ගියාය. 

රේක්කය රැගෙන ඒමට ප්‍රමාදවීම නිසා රේක්කය මිල දී ගැනීමට ආ පුද්ගලයා කඩය ඇතුළට ගොස් විපරම් කරද්දී එම කාන්තාව රේක්කයක් අතේ තබාගෙන පෑනකින් කිසියම් දෙයක් ලියනු දැක රේක්කයක් කීයදැයි විමසීය. 

රේක්කයේ මිල වෙනස්කරනු දුටු බව වෙළෙඳහල් හිමි කාන්තාවට දැනීම නිසා තරමක් තැති ගෙන ගොත ගසමින් රුපියල් 390ක් යැයි කීවාය.

ගනු දෙනුව එතැනින් නැවතූ පාරිභෝගිකයා පුතුත් සමග  වෙළෙඳහලෙන් පිටව ගියේ දොස් නගමිනි.