(කලවාන උපේන්ද්‍ර ප්‍රියංකර ජාතුංගම)
මිතුරන්ට අපූරු සහනාධාර බෙදූ පුද්ගලයකු පිළිබඳව එක්තරා ගමකින් වාර්තා වේ.

සිද්ධිය මෙසේය. 

ඔහු කසිප්පු පෙරීම රැකියාව ලෙස සිදු කරගෙන යයි. කොරෝනා නොමැතිව රට විවෘතව තැබුණු කාලේ ඔහුගේ කසිප්පු ව්‍යාපාරය සරු නොවිණි. ඒ මත්පැන් හල් විවෘතව තැබුණු නිසාය. මිතුරන් ඔහුට ප්‍රකාශ කළේ ඔය රැකියාව නතර කර වෙනත් රැකියාවක් කරන ලෙසය. එහෙත් ඔහු මෙම රැකියාවම සිදු කරගෙන ගියේ වැඩිය මහන්සි නොවී මුදල් හම්බ කිරීමට හැකි නිසාය. 

කෙසේ වෙතත් ඔහුට මෙම දිනවලදී ජයටම ව්‍යාපාරය කරගෙන යාමට හැකිව තිබුණේ බාර් වසා ඇති නිසාය. අකැමැත්තෙන් වුවද ඔහු ඇමතූ මිතුරන් ඔහුගෙන් කසිප්පු ඉල්ලා තිබේ. සමහර මිතුරන් මචන් නෑ කියන්න එපා, කීය වුණත් ගන්නම් යැයි පවසා තිබේ. එවිට මිතුරා පවසා ඇත්තේ ‘‘පිස්සුද සල්ලි ඔනී නෑ. මේ දවස්වල කෑමට සහනාධාර ලැබුණත් බීමට නෑනේ. ඒක නිසා උඹලට බීම සහනාධාරය මගෙන්”‍ යැයි පවසා තිබේ. කෙසේ වෙතත් ඔහු මෙලෙස කසිප්පු රැගෙන යන අතරතුර පොලිසිය ඔහු නතර කර ඇති අතර ‘‘කොහෙද යන්නේ’’ යැයි ඇසූ විට ‘‘මේ යහලු‍වන්ට සහනාධාර දෙන්න යනවා”‍ යැයි කිසිදු පැකිලීමකින් තොරව පිළිතුරු දී තිබේ. ආභරණ පැළඳ සිටින ඔහු දෙස බැලූ පොලිසිය පරිස්සමෙන් ගිහින් එන්න යැයි පවසා ඔහුගේ අනෙක් පොලිස් සගයා අමතා ‘‘අපිට ඔහොම යාළුවො නෑනේ. තේ එකත් අපේ ගානේ’’ යැයි පවසා ඇත්තේ ඔහු දෙස නෙත් කොනකින් බලමිනි.