(පෝද්දල සරත් ආනන්ද ගමගේ)
සිය නිවසේ සිවිලම මත ලැගුම්ගෙන සිටින උගුඩුවන් ජෝඩුවක් පලවා හැරීම සඳහා රතිඤ්ඤා කරලක් පත්තු කර දැමීමෙන් නිවසේ සිවිලිම පැත්තක් කඩාවැටුණු පුවතක් දකුණු පළාතේ ගම්මානයකින් වාර්තා වේ.

රාත්‍රී කාලයේ නිවසේ සිවිලිම උඩ උගුඩුවන් සැරිසැරීම හේතුවෙන් මෙම නිවැසියන්ගේ නින්දට බාධා සිදුවූ අතර රාත්‍රී කාලයේ නින්දෙන් අවදි වී උන් පලවා හැරීමට ගෙහිමියාට සිදුවිය.

උන් පලවා හැරීමට ගතයුතු පියවරක් සොයමින් සිටියදී දිවාකාලයේද උන්ගේ ගමන ආරම්භවී තිබුණි. ඒ පිළිබඳව නිරීක්ෂණය කළ ඔහුට උගුඩුවන් ජෝඩුවක් එහි පදිංචිවී සිටින බව තහවුරු කර ගැනීමට හැකිවිය. උන් පලවා හැරීමට හිතවතුන්ගේ උපදෙස් පැතූ ඔහුට සිවිලිම ඇතුළත ද විදුලි පහන් දැල්වීමට සැලැස්වීමෙන් උන් පලවා හැරිය හැකි යැයි ලැබුණු උපදෙසකට අනුව මුදල් වැය කර නැවත සිවිලිම ඇතුළතද වයරින් කර විදුලි පහන් සවි කළේය. එය යම්තරමකට සාර්ථක වුවද ටික දිනකින් නැවතත් සුපුරුදු ලෙසම උන්ගේ ගමන ආරම්භ වී තිබුණි.

මේ අතර දිනක මිතුරන් සමග පොඩි මධු විත සාදයක යෙදී සිටියදී ඔහුට මේ උගුඩු ප්‍රශ්නය ගැන සිහිපත්ව එය සාකච්ඡා කළේය. එතැන සිටි එක් මිතුරෙකු පැවැසුවේ රතිඤ්ඤා කරලක් දල්වා උන් දෙසට විසි කිරීමෙන් සදහටම උන් පලවා හැරිය හැකි බවයි.

පසු දිනෙක දිවා කාලයේ මොහොතක උගුඩුවෝ දෙදෙනා සිවිලිම මත මහත් දාංගලයක් පටන් ගත්හ. යහළුවා කියූ පිළියම අත්හදා බැලිය යුතු යැයි තීරණය කළ ඔහු නගරයට ගොස් රතිඤ්ඤා පෙට්ටියක් ගෙනාවේය. සිවිලිම උඩට නැගිය හැකි කපොල්ලට ඉනිමග තබා සිවිලටම ගොඩවූ ඔහු රතිඤ්ඤා කරලක් දල්වා උගුඩුවන් සිටි දෙසට විසි කළේය. ඩෝං ගා මහත් හඬින් රතිඤ්ඤය පිපිරී ගිය අතර දඩබඩාස් හඬින් සිවිලිමද කඩා වැටුණේය.

සිදුවූ විපත පිළිබඳව උපදෙස් දුන් මිතුරාට ඒ ගැන දුරකථනයෙන් දැනුම් දුන් විට ‘මං විහිළුවට කිව්වෙ තෝ ඒ ගොන් වැඩේ කළා දැ’යි ඇසීය.

සිය බිරියගෙන් මහත් සේ බැණුම් ඇසූ ඔහුට නිවෙසට පැමිණෙන අයට පිළිතුරු දීමද මහත් පීඩාවක් විය. ඉක්මණින් සිවිලිම පිළිසකර කරගන්නේ කෙසේ දැයි ඒ සඳහා අතිරේක මුදලක් සොයන්නේ කෙසේ දැයි කල්පනා කරමින් සිටින අතරේ ඇදහැලුණු වර්ෂාවකදී සිවිලිම කඩා වැටුණු ස්ථානයෙන් නිවස තෙමෙන්නටද පටන් ගත්තේ බිරියගේ ගෝරනාඩුව දෙගුණ තෙගුණ කරමිනි.