(තිහගොඩ උපසේන ලියනගම)

බස්නාහිර පළාතේ උපනගරයක් ආසන්නයේ පිහිටි මේ ක්‍රීඩාපිටිය පසුගිය කොරෝනා වසංගත සමයේ ක්‍රීඩකයන් නොපැමිණීම නිසා ජරාවාසව පැවැති එකකි. මේ නිසාම එහි ගේට්ටුව අසල විශාල කුණු ගොඩක්ද එකතු වී තිබුණි. 
පසුගියදා ප්‍රදේශයේ තරුණ පිරිසක් මේ කුණු ගොඩ ඉවත්කර ක්‍රීඩා පිටියද පිළිසකර කොට එහි ක්‍රීඩා කිරීමට පටන් ගත්හ. එහෙත් මෙහි කුණු දැමූ සමහරුන් යළිත් එහි කුණු දැමීමට පටන්ගත් අතර ඒවාද ඉවත්කළ තරුණයෝ එහි කුණු නොදමන ලෙස දැන්වීමක්ද සවි කළහ. 
එහෙත් යළිත් කීපදෙනකු කුණු පාර්සල් එහි දැමූවෙන් තරුණයෝ සැලකිල්ලෙන් ඒ ගැන සොයමින් සිටියහ. 
පසුගිය දිනෙක වාහනයෙන් ආ පුද්ගලයකු තම කුණු පාර්සලය එතැනට දමන ආකාරය දුටු තරුණයකු වහා දිව විත් වාහනය ඉදිරිපිට නැවතී කීවේ ඒම පාර්සලය ආපසු රැගෙන යන ලෙසටය. 
වාහනයේ සිටියේ ටයිකෝට් ඇඳි විද්වත් පෙනුමැති අයෙකි.. ඔහු වාහනය නොනවත්වා යාමට තැත් කරනු දුටු තරුණයාගේ හඬට වට පිටාවේ තරුණයෝද එකව ඔහුට වාහනයෙන් බැස ඩිකිය අරින ලෙස කීවේ තර්ජනාත්මකවය. බලෙන්ම වට පිටාවේ වූ කුණු සියල්ල එහි පටවා පසුව යන ලෙස දැන්වූයෙන් බියට හා විමතියටත්, ලජ්ජාවටත් පත් ඔහු වාහනය සෙමින් පදවාගෙන ඉවත්ව ගියේ තරුණ පිරිසගේ හූ හඬ මැදලු.