(තිහගොඩ උපසේන ලියනගම)
ජංගම දුරකතනයෙන් තම ආදරවන්තයා සමඟ දිගු ප්‍රේම සල්ලාපයක යෙදුණු දුවකට අම්මා විසින් ‘‘අඟුරු රොටියක්’’ කෑමට දීමේ සිදුවීමක් පසුගිය දා වාර්තා වූයේ ඇඹිලිපිටිය ප්‍රදේශයෙනි.

මේ දියණිය අගනුවර පෞද්ගලික ආයතනයක සේවයේ නිරත අතර ගමට ආවේ සති අන්තයේ හෝ පෝ දිනවලය.

ඇය එසේ ගෙදර පැමිණි දිනක මව උදෑසන ආහාරය සඳහා රොටි සකස් කර ලුණු මිරිසක් සමඟ රොටි හේනේ වැඩ කරන සැමියාට දීමට සැරසුනාය.

‘‘දුවේ මම තව රොටි ටිකක් හදල ඇති එකක් ළිපේ ඒක බලා ගනින්  කියා දුව කැඳවා එම කාර්යය පැවරූ ඇය කඩිනමින් මේ ගමන ගියාය.

ආපසු එන විට දුව තම ආදරවන්තයා සමඟ දීර්ඝ දුරකතන සංවාදයක යෙදී සිටින බව ජනේලයෙන් දැක ඇය කුස්සිය පැත්තට ගියාය.

ඇයට දෙවියන් සිහිවිය. ලිපේ වූ තැටිය ගිනියම් වී තිබූ අතර රොටිය සම්පූර්ණයෙන්ම අඟුරු බවට පත්ව තිබිණ. කරුණු තේරුම් ගත් මව ලිප නිවා දමා අඟුරු රොටිය බෙලෙක් පිඟානකට දමා ගෙන දුව අසලට ගොස් ‘‘ඔය සල්ලාපයෙන් ටිකක් හලාගෙන මේකත් කාපන්’’ කීවේ දැඩි කෝපයෙන් ලු.