(කටුගස්තොට ධම්මික ගුණවර්ධන)
අලුත ගෙනා මනාලියගේ දැවැද්දට ලැබුන අල්මාරියෙන් ගැරඬින් දෙදෙනකු එළියට පැමිණීම නිසා මනාලියගේ නිවස එකම ජංජාලයක් වූ පුවතක් කටුගස්තොට නුදුරු ගම්මානයකින් වාර්තා වේ. 

වාර්තාවන අන්දමට සිදුවී ඇති සිද්ධිය මෙසේය.

ඇයගේත් ඔහුගේත් එකම ගමේ වැලි කෙළියේ පටන් පැවැති සෙනෙහස ප්‍රේමයක් බවට පත්වුයේ ඇගේ බාල සොහොයුරාගෙන් ලැබුණු ආධාර උපකාරවල ප්‍රතිඵලයක් ලෙසිනි.

 කෙසේ වෙතත් දෙපාර්ශවයේ මවුපියන්ගෙන් එල්ල වූ දැඩි විරෝධය හමුවේ පැවැති ප්‍රේමය මංගල්‍යයකින්  අවසන්වීමට අවස්ථාව නොලැබුනේ වෙනත් මනාලයකුගේ මනාලියකවීමට ඇයට සිදුවූ නිසාය. 

මේ පිළිබඳව දැඩි සිත් තැවුලෙන් පසුවූ ඔහු මේ සිදුවීමට එරෙහිව කුමන හෝ ක්‍රියාමාර්ගයක් ගැනීමට සිතා ඊට විකල්පයක් ලෙස තෝරා ගත්තේ නව  යුවළට කොට්ට දෙකක් යැවීමට අවශ්‍ය බව පවසමින් ඇගේ බාල සොයුරාගෙන් දැවැදි සමඟ යවන අල්මාරියේ යතුර සුළු වේලාවකට ඉල්ලා ගැනීම පමණි.

 කිසිත් නොදත් මනාල යුවළ සිය මධු සමයද ගතකොට දින දෙකකට පසු ලැබුණ තෑගි බෝග  හා දෑවැදි මනාලයාගේ නිවසේ අස්පස් කරන අතර විවෘත කළ අල්මාරියෙන් හදිසියේ එළියට ආ විශාල ගැරඬින් දෙදෙනෙකු නිසා මනාල නිවසේ බොහෝ බඩු බාහිරාදිය ද කැඩී බිදී යාමට ගතව ඇත්තේ ද සුළු වේලාවකි.

 පසුව ආරංචි  වූයේ මනාලියගේ පැරණි පෙම්වතා  කොට්ට දෙකක් දෙන මුවාවෙන් ගොනියක දැමූ ගැරඬින් දෙදෙනා අල්මාරියේ දමා ඒවා ඇති බවය.