වියලු‍ව වාර්තාකරු 

තම දියණියගේ විවාහ මංගල්‍යය දා දියණියටත් සිය අනාගත බෑනාටත් ඔවුන්ගේ මිතුරන්ගෙන් අත් විඳින්නට සිදුවන නවක වදයෙන් බේරා ගැනීම සඳහා තම ගම්මානයේ සිට මැර පිරිසක් රැගෙන ගොස් සූදානමින් තැබූ මාමණ්ඩියකු පිළිබඳ පුවතකි.
 සිද්ධිය මෙසේය.
 ඔහු නගරබද ප්‍රදේශයක තරුණයෙකි. රජයේ රැකියාවක නිරතවූවෙකි. ග්‍රාමීය ප්‍රදේශයක සිට රැකියාවට පැමිණි ඇයද සේවය කළේ ඔහු සේවය කළ ආයතනයේමය. කලෙක සිට පැවැති දෙදෙනාගේ දැන හැදුනුම්කම ආදරයක් බවට පෙරලු‍නි. ආදර සබදතාව කෙළවර වූවේ විවාහ යෝජනාවකිනි. ඒ දෙපාර්ශ්වයේම ඥාතීන්ගේ ආශිර්වාද මැද්දේය.
තරුණයාගේ පාර්ශ්වයේ උදවිය නගරයේ හැදී වැඩුනු අය වීම නිසාම මනාලයා මෙන්ම ඔහුගේ පාර්ශවයේ පිරිස ද තරමක් සංකර වූ අතර මනාලියගේ පියාට සිය බෑනනුවන්ගේ අඩුවක් ලෙස දැනුනේ නම් ඒ එම සංකර බව පමණි. එහෙත් අනාගත බෑනා අත්හැර දමන්නට ඔහු අකමැති වූයේ ඔහු තුළ තිබූ ආකර්ෂණීය පෙනුමත් ධනය මෙන්ම බලයත් උගත්කමත් නිසාය.

විවාහය තීන්දු කෙරුණේ සම්ප්‍රදායික නැකත් චාරිත්‍ර වාරිත්‍රවලටද ගරු කරමිනි. නගරයේ ප්‍රසිද්ධ හෝටලයක මංගල උත්සවය පැවැතියේ දෙපිරිසේම නෑ හිතවතුන්ගේ සහභාගීත්වයෙනි.
මංගල උළෙල අතරතුර මංගල උත්සවයකට නොගැළපෙන අයුරින් හැඳ පැලඳගත් රස්තියාදුකාර පෙනුමක් ඇති තරුණ පිරිසක් උත්සවය පැවති හෝටලය සහ තැන තැන ගැවසෙනු එහි සිටි බොහෝ දෙනකුගේ අවධානයට ලක් වූ අතර උත්සවයට පැමිණි පිරිස අතර එම පුවත පැතිරෙන්නටද වැඩි වෙලාවක් ගත නොවිණි.
ඒ දුටු ඇතැමුන් පවසා සිටියේ මනමාලියට කලින් ආදරය කළ තරුණයෙකු පැමිණ මංගල උළෙල කඩාකප්පල් කරන්නට සූදානමක් ඇති බවකි. කෙසේ වෙතත් බොහෝ දෙනෙකුගේ අවධානයට ලක් වූයේ මේ තරුණ පිරිස පිළිබඳවය. පසුව දැනගන්නට ලැබුණේ මංගල උත්සවය අවසානයේ දී මනාලයාගේ මිතුරන් පිරිසක් විසින් මනාලියට හා මනාලයාට ලබා දීමට නියමිතව තිබූ නවක වදයෙන් ඔවුන් දෙදෙනා බේරාගෙන මධුසමය ගත කිරීම සඳහා යෑමට අවශ්‍ය ඉඩ සලසා දීම සඳහා මනාලියගේ පියා විසින් මෙම පිරිස කැඳවාගෙන විත් ඇති බවකි. 
මනාලිය හා මනාලයා වෙනුවෙන් තමුන් සැලසුම් කළ නවක වදය අත්හැර දමන්නට උගත් මිතුරන්ට සිදුවූවේ දෙපාර්ශවගේම ආත්ම ගෞරවය රැකදෙමිනි.