අලූතින් සෑදීමට යන නිවෙස සඳහා අත්තිවාරම් කැපීමට පෙර බහිරව පූජාවක් පැවැත්විය යුතු බව ගෙදර අය කතා වූහ. මේ සඳහා සුදුසුම පුද්ගලයා කන්දේ දේවාලයේ සුද්දප්පු ගුරුන්නාන්සේ බව වටහාගත් ගෙහිමියා සුද්දප්පු ගුරුන්නාන්සේ හමුවීමට ගොස් තම අවශ්‍යතාව පැවසීය. “දැන් කීයටද ඔය නැකත තියෙන්නේ” සුද්දප්පු ගුරුන්නාන්සේ ගෙහිමියාගෙන් විමසීය. “හරියටම බ‍්‍රහස්පතින්දා උදේ හයයි පහට” ගෙහිමියා පිළිතුරු දුන්නේය. “චහ්! හරියටම එදාටම ඒ නැකතටම මට තවත් රාජකාරියක් තියෙනවා ඉස්කෝලේ මහත්තයන්ලැ ගෙදර. ඒක තමයි ප‍්‍රශ්නෙ” “අනේ ගුරුන්නාන්සේ බෑ කියන්න නම් එපා. මේක අපට කරලාම දෙන්නැ” යි ගේහිමියා ඇවිටිලි කළේය. “හරි ඒකට මම පිළිවෙළක් යොදන්නම්, මෙන්න අඩුම කුඩුමවල ලැයිස්තුව. වැඬේ ලෑස්ති කරන්න මම එන්නම්” යැයි ගුරුන්නාන්සේ පැවසීය. බහිරව පූජාව පැවැත්වීමේ වේලාට ආසන්න වුවත් ගුරුන්නාන්සේ පැමිණියේ නැත. හදිසියේම ගෙපළ කපන ස්ථානයට ත‍්‍රීරෝද රථයකින් පැමිණි ගුරුන්නාන්සේ ගෙහිමියන් අමතා, කලබල වෙන්න කාරි නෑ, අපි වැඬේ කරමු” යි පැවසීය. “ගුරුන්නාන්සේ දැන් නැකැත්වේලාව පහුවෙලා” යයි ගෙහිමියා පැවසීය. “කාරියක් නෑ. මම බහිරව උන්නාන්සේත් එක්ක කතා කරගත්තා. මම ඇස්.ඇම්.ඇස්. එකක් ගැහුවා පූජාව ටිකක් පරක්කු කරමු කියා, උන්නාසේ ඒකට එකඟවුණා” යයි ඇඟටපතට නොදැනී ගුරුන්නාන්සේ පැවසීය.“දෙයියෝ සාක්කි” යැයි ගෙහිමියාට ඉබේටම කියවුණා ලූ.