මොරගොල්ලාගම - සිසිර නන්දන කැලේගම 

මව්පියන්ගේ හිතට සහනයක් දෙමින් පුතු සොයාගත් අනාගත සහකාරිය පුතුගේ සේසත රැගෙන පලා ගිය පුවතකි.
සිද්ධිය වාර්තා වෙන්නේ හස්ති ශෛල පුරවරයෙනි.
පුතු පවුලේ වැඩිමලාය. රජයේ රැකියාවක නියැළෙන කඩවසම් පෙනුමැති අයෙකි. කල දශාව ඉක්ම යන බැවින් හා මව්පිය දෙදෙනා රෝගී වන නිසා ගෙදර තනි නොතනියට මනාලියක ගෙනඑන ලෙසට පවුලේ උදවිය නිතර නිතර ඔහුට ඇවිටිලි කළහ.

මඟුල් කපුවන්ට පවා එම කාර්යය කර දෙන ලෙසට බාර දී තිබුණි.
ඒ අනුව මඟුල් කපුවන්, හිතවතුන් කොතෙක් යෝජනා ගෙනාවත් ඒ සියල්ලට ඔහු අකමැතිය. ඔවුනගේ කුමන හෝ අඩුවක් පෙන්වා දී ඔහු ඒවා ප්‍රතික්ෂේප කළ අවස්ථා එමටය.
මේ තත්වය හමුවේ වියපත් මව්පිය දෙදෙනා පසු වුණේ දැඩි කනස්සල්ලෙනි. එය පුතු ද දැන සිටියත් සුදුස්සකු නොමැති තැන හිත ගිය සහකාරියක දෙසට ඔහුගේ නෙත ගැටුණි.
ඒ නිවාඩුවට ගෙදර ඇවිදින් බස් රථයක අහම්බෙන් ගමනක් යන අතරවාරයේදීය.
ඔහුගේ අසුනේම තරුණියක වාඩි වුණාය. ඇයට ඔහු කතා කළේය.
“නංගි ජොබ් එකක් කරනවාද?” 
“ඔව් මං ටීචර් කෙනෙක්”‍ 
“කොහේද වැඩ කරන්නේ?”‍
“ඉස්සරහින් හමුවෙන පාසලේ ප්‍රාථමිකයේ මං උගන්වනවා.”‍
“කොහේද ඉන්නේ?”‍ 
“මම බස් එකට නැගපු තැනම ඇති අතුරු පාරේ හැරෙන තැනම ඇති ගෙදර.”‍
“ඔයා මැරි කරලද?”‍ 
“අපෝ නෑ. තව හිතලවත් නෑ.”‍ 
“මම කැමතියි ඔයා බඳින්න. මොකද කියන්නේ?”‍ 
“හා.. එහෙමද? එහෙනම් ගෙදර අම්මලාගෙන් අහන්න ඕනෑ. ඔයා එන්න ගෙදර.”‍ ඇය කීවාය.
ඔහු ඇයට සමීප විය. ඔහු ඇයගේ අත අල්ලා ගත්තේය. පිරිමැද්දේය. ඇය ද සහයෝගය දුන්නේය. ඔහු මුද්ද ගැලෙව්වේය. ඇයට දී ඇයගේ අතින් එය ඔහුගේ අතට දා ගත්තේය.
පසුව ඇය එම මුද්ද ගලවා ගත්තාය. ඔහුට ඇයගේ අතට දමන්නට කීවාය. ඔහුත් එය එලෙසම කෙරුවේය. නියමයි. කිරලා මැනලා දැම්මා වගේය.
“ඒක ආයේ ගලවන්න එපා. ඔහොම තිබියදෙන්. ඔයා අපේ ගෙදර එන්න. මං කැමතියි නම් ගෙදරින් ප්‍රශ්නයක් නෑ.”‍ ඇය කීවාය. ඔහු ඇයට සමු දුන්නේය. ඇය පාසල ඉදිරිපිටින් බැස්සාය. ඔහුගේ පවුම් බාගයක පමණ රන් මුද්ද ඇයගේ අතේය. ඔහු ඇයට වශී වූවාක් මෙනි. එය ඇයටම දී නොපමාව එන බව පවසා ඔහුත් ඇයට යන්නට ඉඩ දුන්නේය. ඔහු තම ගමන ගොස් ගෙදරට ආවේය.
පියාට, මවට මෙන්ම පවුලේ හැමෝටම සහකාරියක හමු වූ පුවත සැල කර සිටියේය. මව්පියන්ටද නිම් හිම් නැති සතුටකි. තම පුතු වැඩට යන්නට මත්තෙන් ඇයගේ ගෙවල් බලන්නට යාමට සැරසුණි.
තම නිවෙසට නුදුරු ගමක ඇති එම ඉසව්ව ඔවුහු සොයා ගියහ. එවැනි නමක් ඇති පියකු හෝ ගුරුවරියක හතර දිග්බාගයක නැත. පසුව එකී පාසල සොයා ගියද, ඇය එහිද නැත.
වහසි බස්වලට පුතු අසුවී රන් මුදුවට ද කෙළවාගෙන ඇති බව වටහාගත් පියා ඇතුළු පිරිස වාහනයට නොදුටු මනාලියක වෙනුවෙන් හයර් එක ගෙවා හිස් අතින් ආපසු ගෙදරට ආවාලු‍.