මෙම සිදුවීම වාර්තා වූයේ ස්වභාවික සම්පත් බහුල පැත්තකිනි. තරුණයකුට මනාලියක් ජෝඩු කළ මහතෙක් මුණගැසීමට එම තරුණයා මිතුරකු සමග ගියේ යතුරුපැදියෙනි. ”මනමාලිය බැලීමට අපි වාහනයකින් යමු දැයි” තරුණයා විමසූ විට මඟුල් කපු මහතාගේ මුහුණේ දිස්වූයේ කලකිරුණු පෙනුමකි. ”මගේ මෝටර් සයිකලෙත් තියනවානේ. ඒවාවල යමු” ඔහු පැවසීය. ඔහුගේ හැසිරීම තරුණයන් හට ප‍්‍රහේළිකාවක් වුවත්, කිසිවක් නොදොඩා පිටත් වූහ. පාර අසල නිවෙසකට ආ කපු මහතා, ”මහත්තයලා ටිකක් ඉන්නකෝ” කියමින් එතුළට ගියේය. ටික වේලාවකින් ඔහු පැමිණියේ හොඳින් හැඳ පැළඳගත් කාන්තාවක් ද සමඟය. එහෙනම් අපි යමු” කී ඔහු කාන්තාව ද යතුරුපැදියේ  වාඩිකරගත්තේය. පැය භාගයක ගමනකින් පසු පිරිස නිවෙසක් ඉදිරිපිටට පැමිණි අතර, ”මහත්තයලා එළියෙන් ඉන්න” යැයි පැවසූ කාන්තාව නිවෙසට පිවිසියාය. එම නිවසේ මනාලයකු පිළිගැනීමට තරම් සූදානමක් නොතිබිණි. ගෙතුළින් උස් හඬින් කතා බහ ඇසුණි. ”මොනාද මේ වෙන්නේ?” තරුණයා කපු මහතාගෙන් විමසීය. ”මහත්තයාට බලන්න එන්න කියාපු මනමාලි යාළුවෙලා හිටපු ළමයාත් එක්ක යන්න ගිහිල්ලා. ඒ නිසා මම හඳුනන කපු නෝනා කෙනෙක්ව තමයි එක්කරගෙන ආවේ. එයා කීවා මේ ගෙදරත් මනමාලියක් ඉන්නවා කියලා” ඔහු කාරණය පැහැදිලි කළේය. ”කට්ටිය ඇතුළට ආවා නම්” ඒ මඟුල් කපු මහත්මියගේ ඇරියුමකි. තරුණයන් තේ පැන් සංග‍්‍රහය භුක්ති විඳීමෙන් අනතුරුව තරුණයාට සහ තරුණියට තනිවම කතා කිරීමට අවසර ලැබිණි. තරුණයාට ඇය ගැන පැහැදීමක් ඇති වූ අතර, ඇයට ද ඔහු ගැන ඇල්මක් ඇති විය. මවුපියන් සමග නැවත පැමිණෙන බව පැවසූ තරුණයා අන් අය සමග නිවසෙන් පිට වූයේ ඉතාමත් සතුටිනි.