වියලු‍ව වාර්තාකරු 
අගනුවර ප්‍රදේශයේ කොන්ක්‍රීට් වැඩපොළක දහඩිය වගුරවමින් සේවය කරන තම පුතුගේ වියදමින් ඉදිවන නව නිවෙසේ ඉදිරිපස දොර ගලවා විකුණා ලබාගත් මුදලින් බූරුවා ගසා පරාජයට පත්ව නිවැසියන්ගේද සෙනෙහස අහිමිකරගත්  පියකු පිළිබඳ පුවතකි.

  ඔහු සුරාවට මෙන්ම සූදුවට ඇබ්බැහි වූ මැදි වියේ පුද්ගලයෙකි.

 දිය කදුරුවලින් වැලි ගොඩ දමා ඒවා අලෙවි කිරීම ජීවිකාව කරගත්තේය. උදේ සිට මහන්සි වී උපයා ගන්නා මුදලින් සොච්චමක් නිවෙසේ වියදමට දුන් හෙතෙම ඉතිරි සියල්ල විය පැහැදම් කළේ සුරාවට හා සූදුවටය. 

පියාගේ නොපනත්කම් දරාගත නොහැකි වූ වැඩිමහල් දරුවා අගනුවර ප්‍රදේශයේ කොන්ක්‍රීට් වැඩපොළක රැකියාවට ගියේ පවුලේ එදිනෙදා වියපැහැදම් හෝ පියවා ගැනීමේ අටියෙනි.

නිවෙසේ වියපැහැදම් හැකි පමණින් සැපිරූ හෙතෙම මහ ගෙදරට යාබද ඉඩමේ නව නිවෙසක් ඉදිකිරීම ආරම්භ කළේ ටිකෙන් ටික ඉතිරි කරගත් මුදල් වැය කරමිනි. පසුගිය නිවාඩුවට පැමිණි හෙතෙම රුපියල් විසිපන්දහසක් පමණ මුදලක් ගෙවා ලී මඩුවකින් සකස්කරගත් නවීන පන්නයේ දොරක් ගෙනැවිත් නිවෙසේ ඉදිරිපස උළුවස්සට සවිකළේ නිවසේ ආරක්ෂාව පිළිබඳවද මෙනෙහි කරමිනි.

මේ අතර ගමේ ඉළව් ගෙදරක රාත්‍රී කාලයේ පැවැත්වෙන සූදු පොළක් පිළිබඳ කන වැකුණු ඔහුගේ පියා අතේ තිබූ සුළු මුදලද රැගෙන එහි ගියේ සුපුරුදු සූදු කෙළියේ යෙදීමටය. එහෙත් ඔට්ටු දෙක තුනක් අල්ලද්දී සාක්කුව හිස් කරගත් හෙතෙම පරාජිතයකු සේ බූරුපොළෙන්  පිටවූයේ යළිත් ඔට්ටුවක් ඇල්ලීමට කෙසේ හෝ මුදලක් සොයාගන්නේ කෙසේදැයි මෙනෙහි කරමිනි.

 දහඅතේ කල්පනා කරමින් සිටියදී ඔහුගේ සිහියට ආවේ තම දරුවා අලු‍තින්ම සාදන නිවසේ ඉදිරිපසට සවිකළ නවීන පන්නයේ දොරය. දෙවරක් නොසිතූ හෙතෙම   දොර පලු‍ව ගලවාගෙන රෑ මැද්දේ ම එය තම හිතවතකුට රුපියල් 10,000 ක මුදලට උකස් කළේ හැකි විගස එය පොළියක්ද ගෙවා බේරාගන්නා බව පවසමිනි.

 ලද මුදලද රැගෙන යළිත් සූදු පොළට ගියද යළිත් ඔහුට හිමි වූයේ පරාජය පමණි. අවසානයේ  හොර පූසකු සේ නිවසට රිංගා ගත්තද ඒ වන විටත් නිවැසියන් සිදු වූ සියල්ල දැනගෙන තිබූ අතර ඔහුට ලු‍ණු ඇඹුල් ඇතිව සංග්‍රහ කළේ තව දුරටත් නිවෙසේ රැඳී නොසිට පිටව යන්නැයි  තර්ජනය කරමිනි.

 දැන් ඔහු සිටින්නේ වැලි තිප්පොළේ අටවාගත් ලෑලි  මඩුවකය.