කලවාන - උපේන්ද්‍ර ප්‍රියංකර ජාතුංගම
බිරිඳගේ ජංගම දුරකථනය ත්‍රීරෝද රථය තුළ අමතකවීමෙන් දෙවරක් හයර් ගෙවීමට සිදු වූ සිද්ධියක් සබරගමුව පළාතේ එක්තරා නගරයකින් අසන්නට ලැබුණි.

සිද්ධිය මෙසේය,  

ඇය මුහුණු පොත වෙත  බොහෝ ලෙස ඇබ්බැහි වී සිටින්නියකි. ඇබ්බැහිවීම කෙසේද යැයි කිව්වොත් උයන පිහන කටයුතුවලදී මෙන්ම වැසිකිළිය තුළදී පවා ජංගම දුරකථනය රැගෙන ගොස් මුහුණු  පොතේ සැරිසැරීමට කටයුතු කරන්නියකි. කෙසේ වෙතත් ඇයගේ සැමියා මේ සැම ඉවසා දරා සිටින්නේ බැඳගත් බෙරය කෙසේ හෝ ගැසිය යුතු බැවිනි. 

ඇයගේ දුරකථනයට විශාල වියදමක් දරා බිල් ගෙවා දැමීමටද ඔහුට සිදු වන අතර ඔහුගේ වැටුපට අමතරව හිත මිතුරන්ගෙන් ණය පවා ගැනීමට ඔහුට සිදුව තිබේ. 

මෙම සිදුවීම වූ දිනයේ ඔහු ඇයත් සමග නගරයට ගොස් ඇත්තේ නිවසට අවශ්‍ය ආහාර ද්‍රව්‍ය මිලදී ගැනීම සඳහාය. ඇයද මුහුණු පොතෙහි පලවන විවිධ කෑම වර්ග සෑදීම සදහා අවශ්‍ය ද්‍රව්‍ය ගෙන ඇත්තේ දුරකථනය පරීක්ෂා කරමිනි. මාසයට අවශ්‍ය ආහාර ද්‍රව්‍ය මිලදී ගන්නා බැවින් ඔවුන් ත්‍රීරෝද රථයක් කුලියට ගෙන නිවස බලා පිටත්ව ගොස් තිබේ .

ත්‍රීරෝද රථය තුළ  දුරකථනයේ රැඳෙමින් එම දුර ගෙවා දැමූ ඇය නිවසට පැමිණ සැමියා හා එක්ව බඩු බා ත්‍රීරෝද රථය පිටත් කර තිබේ . බඩු ටික මුලු‍තැන්ගෙය වෙත රැගෙන ගිය වහාම සිය ජංගම දුරකථනය නොමැති බව දැනගත් ඇය කලබලයට පත්ව සිය සැමියා අමතා සිද්ධිය පවසා තිබේ.

 අඳුනන ත්‍රීරෝද රථයක් හෙයින් ත්‍රීරෝද රථ රියදුරු  අමතා විස්තරය පවසා ඇති අතර  දුරකථනය ත්‍රීරෝද රථය තුළ තිබෙන බව එම රියදුරු  පවසා තිබේ. ‘ඒක ගෙනත් දෙන්න පුළුවන් දැ’ යි විමසූ විට ත්‍රීරෝද රථ රියදුරු ‘ගෙනත් දෙන්නනම් පුළුවන්, ඒත් මහත්මයා මට හයර් එක ඕනි’  යැයි පවසා තිබේ. 

මේ දිනවල පවතින ඉන්ධන මිල අනුව විශාල මුදලක් ත්‍රීරෝද රථයට ගෙවීමට සිදුවූවත් එක විනාඩියකට පවා දුරකථනය නොමැතිව සිටීමට නොහැකි බිරිඳගේ කන්දොස්කිරියාවෙන් මිදීමට ඔහු ඩබල් හයර් ගෙවා දුරකථනය ගෙන්වාගෙන තිබේ.