(නිකවැරටිය ප්‍රියාණි මංගලිකා)
ඇඳිරි නීති සමයේ නිවෙසේ අගහිඟ තිබියදී, ඒවා පසෙක ලා  මත්පැන් පානය  කරන සැමියාට අපූරු කටගැස්මක් දුන් බිරිඳක් පිළිබඳ පුවතක් කුරුණෑගල දිසාවේ  එක්තරා පෙදෙසකින් වාර්තා වේ.

සිද්ධිය මෙසේය:-

රට පුරා පවතින ඇඳිරි නීතිය ⁣හා ආදායම් අහිමි වීමෙන් දිනෙන් දින පවුලේ  අගහිඟද ඉහල යමින් තිබුණි. දරුවන් තිදෙනකු සහිත  පවුලේ  එදිනෙදා  අවශ්‍යතා සඳහා බිරිඳ ණය තුරුස් වී  ලබා දෙන මුදලින්ද  සැමියා මත්පැන් පානය කිරීම හේතුවෙන් බිරිඳ මහත් පීඩාවට ලක්ව සිටියාය.

 මෙදිනද පොලියට ගත් මුදලට බඩු තුණ්ඩුවක්ද ලියා දී ඒවා රැගෙන එන ලෙස බිරිඳ සැමියාට බාර දුන්නේ  තමන්ට කුඩා දරුවාද රැගෙන පාරට බැසීමට නොහැකි නිසාවෙනි.

 මින් මහත් සතුටට පත්වූ සැමියා මගට බැස්සේ මත්පැන් ගැණීමේ සිහිනයටද ඉව අල්ලමිනි. මග නැවතුන සැමියා  බිරිඳ දුන් බඩු තුණ්ඩුව අතට ගෙන එහි ප්‍රමාණයන් වෙනස් කරමින් මත්පැන් ගැනීමට අවැසි මුදලද ගලපා ගත්තේය.

 බඩු ටිකක් ද රැගෙන සවස් වී බීමත්ව පැමිණෙන සැමියා දුටු බිරිඳටද මළ පැන්නේලු‍. තමා ලියා දුන් බඩු ප්‍රමාණ අඩුව හා ඇතැම් බඩු වර්ග නොමැති වීමද බිරිඳගේ කේන්තිය දෙගුණ තෙගුණ  වූයේලු‍.

  සැමියාට බැණ වැදුන බිරිඳ  සියල්ල ඉවසා දරාගෙන කුස්සියට ගොස් වහා උයා පිහා දරු තිදෙනාට කන්නට දුන්නේලු‍. සැමියා කාමරයට වී මත්පැන් බොමින් පදම් වී බිරිඳගෙන් කටගැස්මක් ඉල්ලමින් කෑ ගැසුවේ මේ අතරතුරය.

“නෝනේ මට කරවල කෑල්ලක් බැදලා ගේනවද”‍ සැමියා කීප වරක් කෑ ගසද්දී බිරිඳට තවදුරටත් යකා නැග්ගේ බඩු මල්ලේ කරවල නොතිබීම හේතුවෙනි.

    සැමියාට අමතක නොවන  හොඳ කරවල බැදුමක් දීමට අදහස් කළ බිරිඳ කුස්සියට ගොස් ලිපේ තිබූ නිවී ගිය දර අඟු‍රු  ටිකක් දීසියට දමා සැමියා ළඟින් ගෙනගොස් තැබුවේලු‍. බීමත්ව සූර් වී සිටි සැමියා අඳුරේම අතපතගා අඟු‍රු කමින් මත්පැන් බීවේය.

”‍මේ ගෑනිට හරියට කරවල කෑල්ලක්වත්  බැදගන්න බෑනේ. ඒකත් කර කරනවා ”‍....යැයි  සැමියා කියනු ඇසුණ බිරිඳ කාමරයට වී තනිවම සිනාසුණේ එතුවක් වේලා සිතට නැගී තිබුණ කේන්තිය ද අකා මකා දමමිනි.