හාරිස්පත්තුවේ මොහොමඩ් ආසික්

නිවසට අවශ්‍ය පාරිභෝගික ද්‍රව්‍ය මිල දී ගැනිම සඳහා සුපිරි වෙළෙඳ සලකට සිය සේවකයකු සමඟ ගිය ව්‍යාපාරිකයකු යාචකයෙකු යැයි සිතා එක් පුද්ගලයකු විසින් බත් පාර්සලයක් සහ රුපියල් 50 ක මුදලක් ලබා දීමේ පුවතක් වාර්තා වෙයි.
වාර්තා වන අන්දමට මෙම සිද්ධිය සැකෙවින් මෙසේය.
මහනුවර නගරයට නුදුරින් පිහිටි සුපිරි වෙළඳ මධ්‍යස්ථානයකට ව්‍යාපාරිකයකු ගියේ සිය සේවකයකුද සමඟ මෝටර් රථයෙනි. ඔහු නිවසේ හැඳ සිටි සාමාන්‍ය ඇඳුමකින් මෙම ගමන ගිය නිසා ඒ අවස්ථාවේ ඔහුගේ පෙනුමෙන් ව්‍යාපාරිකයකු ලෙස සිතිය නොහැක. මෙම ව්‍යාපාරිකයා සිය සේවකයාට අවශ්‍ය භාණ්ඩ මිල දී ගෙන එන ලෙස දන්වා ඔහු වෙළෙඳ මධ්‍යස්ථානයට පිටත වාහන නවත්වන ස්ථානයේ ඇති බංකුවක වාඩි වී සිටියේය. එම අවස්ථාවේ එම ස්ථානයට පැමිණි තවත් පුද්ගලයෙකු පැමිණියේ අතේ මල්ලක්ද රැගෙනය. 

එම මල්ලේ තිබුණේ යාචකයින් සඳහා ලබා දීමට නිවසින් ගෙනා බත් පාර්සල් කිහිපයකි. සුපිරි වෙළෙඳ සල අසල බංකුවක අහිංසක ලෙස වාඩි වී සිටින මෙම ව්‍යාපාරිකයා ද යාචකයකු බව සිතා ඔහුටද බත් පාර්සලයක් සහ රුපියල් 50 ක මුදලක්ද ලබා දී කිසිවක් කතා නොකර එම පුද්ගලයා එතැනින් නික්ම ගොස් ඇත. 
මේ සම්බන්ධයෙන් අදාළ පුද්ගලයා දැනුවත් කිරීමට හෝ වේලාවක් නොමැති වූ ව්‍යාපාරිකයා තමා යාචකයකුගේ තත්වයට පත් වීම ගැන දැඩි කනස්සල්ලක් ඇති කර ගෙන ඇති අතර සුපිරි වෙළෙඳ සල තුළ භාණ්ඩ මිල දී ගන්නා තම සේවකයා නැවත පැමිණීමට පෙර මෙම බත් පාර්සලයට කුමක් හෝ කළ යුතු බව සිතූ ඔහු වහාම මාර්ගය දෙස ටික දුරක් ගමන් කර මාර්ගයේ හමු වූ සැබෑ යාචකයකුට එම බත් පාර්සලය සහ ඔහු ලබා දුන් රුපියල් 50 ක මුදලද ලබා දී ඉක්මනින් ඔහු සිටි තැනට පැමිණියේය. 
ඒ වන විටත් ඔහුගේ සේවකයා භාණ්ඩ මිල දී ගෙන පිටත පැමිණ ව්‍යාපාරිකයා සොයමින් සිටියේය. සිදු වූ කිසිවක් සේවකයාට නොකීමට පරිස්සම් වූ ව්‍යාපාරිකයා සිය මෝටර් රථයෙන් සේවකයාද රැගෙන එම ස්ථානයෙන් නික්ම යාමට පියවර ගත්තේය.