රුවන්වැල්ල - විමලරත්න සමරක්කොඩි

ඉවතලන යකඩ බඩු, පොල් කටු හා පරණ පත්තර ආදිය එකතු කිරීමෙහි යෙදී සිටි පිරිසක් පොල් කටු ගෝනියක් තුළ සිටි නයකු දැක මහත්සේ බියට පත්ව, බඩු එකතු කිරීම ද පසෙක තබා, පැමිණි වාහනයෙන් වහා පිටව යාමේ පුවතක් අඟු‍රුවැල්ල නගරයට නුදුරින් පිහිටි ගම්මානයකින් අසන්නට ලැබිණි.
යකඩ ඇතුළු ඉවතලන පරණ බඩු එකතු කිරීම සඳහා තිදෙනකුගෙන් සමන්විත මෙම පිරිස සති දෙකකට පමණ වරක්‍ මෙම ගම්මානයට ද පැමිණීම පුරුද්දක් ලෙස කරගෙන ගොස් ඇත. ප්‍රධාන පාරෙන් අතුරු පාරක් දිගේ ගමන් කළ විට හමු වන මෙකී ගම්මානයේ ඔවුන් දැන හැඳිනගත් කිහිප දෙනෙක් ද සිටියහ.
එසේ තිබියදී පසුගිය දිනෙක වාහනයෙන් පැමිණ ගම්මානයට ඇතුළු වූ ඔවුහු ගෙයක් ගෙයක් පාසා ගොස් බඩු එකතු කිරීමෙහි නිරතව සිටියහ. එහිදී එක් නිවැසියකු පවසා ඇත්තේ, පොල් කටු ගෝනි තුනක් තමා සතුව ඇති බවත්, ඒවා විකුණා දැමීමට තීරණය කර ඇති බවත්ය.

ඒ බැව් ඇසූ බඩු එකතු කරන අයවලු‍න්, ගණන් කිරීම සඳහා පොල් කටු ගෝනි තුන ගෙනැවිත් මිදුලේ හලන ලෙස ඔහුට පවසා තිබේ. ඒ අනුව ගෙහිමියා ද නිවෙස පිටුපස තිබූ පොල් කටු ගෝනි තුන රැගෙනවිත් එකිනෙක මිදුලට හලා ඇත. එහිදී පළමු ගෝනියේ තිබූ පොල් කටු ගණන් කිරීමෙන් පසු ගෙහිමියා දෙවැනි ගෝනිය ද මිදුලට හලා ඇත. එවිට ඔවුන් සැම දෙනාම පුදුමයට පත් කරමින් සාමාන්‍ය තරමේ නයකු පිඹිමින් පෙණය පුප්පා පොල් කටු අතරින් හිස ඔසවා ඇත. එම දර්ශනය දුටු පිරිස දැඩි ලෙස බියට පත්වීමෙන් පසු පළමුව ගෙහිමියා ගෙතුළට දිව ගොස් තිබේ. එවිට බඩු එකතු කරන්නන් ද පණ බයේ වාහනයට දිවගොස් වහා ගමෙන් පිටව ගොස් තිබේ.
මෙම සිදුවීමෙන් පසු මේ වනතුරුත් බඩු එකතු කරන වාහනය ගමට නොපැමිණි බව මෙහිදී මේ පිළිබඳව අදහස් දැක්වූ ගම්වාසීහු පවසා සිටියහ.