වසර අවසානයේ මිතුරන් පිරිසක් සමග මත්පැන් සාදයක් පවත්වන්නට සැලසුම් කර එම සාදය තමන්ගේ සහෝදරයකු වන මිතුරෙකු වන රජයේ ඉහළ පෙළේ තනතුරක් දරණ නිලධාරියකුට අයත් හෝටලයක පවත්වන්නට යෝජනා කර හෝටලය වෙන් කිරීමට අත්තිකාරම් මුදල් ලබාදීමට ගොස් එම නිලධාරියා නොහඳුනන බවට මිතුරන්ට හෙළිවීම නිසා සිය මිතුරන් අතරම උපහාසයට ලක්වූ පුද්ගලයකු පිළිබඳව පුවතක් සීතල පළාතක ගම්මානයකින් වාර්තාවේ 
සිද්ධියට සම්බන්ධ පුද්ගලයා තම උපන් ගමේම පදිංචිව රැකියාවක නිරතව සිටින අයෙකි. නත්තල උදාවීමත් සමග රටේ විවිධ ප්‍රදේශවල රැකියාවල නිරතවූ ඔහුගේ සම වයසේ මිතුරන් සියලුම දෙනා නිවාඩු ලැබ  ගම්බිම් වෙත පැමිණ සිටින අතරතුර නව වසර උදාවීමේ සතුට සැමරීම සඳහා මත්පැන් සාදයක් පවත්වන්නට මිතුරන් පිරිස අතරින්  යෝජනාවක් ඉදිරිපත්වී ඇත. යෝජනාව ඉදිරිපත්වූ සැණින් එම සාදයේ සංවිධාන කටයුතු භාරගත් මෙම පුද්ගලයා එම සාදය තමන් සමග දැඩි ලෙස කුළුපග රජයේ ඉහළ පෙළේ තනතුරක් දරන නිලධාරියාට අයත් හෝටලයේ පැවැත්විය හැකි බවත් ඒ සඳහා ඉතා ලාභදායි පැකේජයක් වෙන් කර ගතහැකි බවත් මිතුරන් පිරිස අතර පුරසාරම් දොඩා ඇත. 

හෝටලය තම සාදයට වෙන් කිරීම සඳහා පසුදින මිතුරන් පිරිස අදාළ හෝටලයට ගොස් ඇති අතර පිළිගැනීමේ කවුන්ටරයේ සිටි පුද්ගලයාගෙන් ඒ පිළිබඳව විස්තර විමසා ඇත. එම පුද්ගලයා හෝටලය පිළිබඳව විස්තර පවසන අතරතුර සාදයේ සංවිධාන කටයුතු භාරගත් පුද්ගලයා එම හෝටලය තම කුළුපග මිතුරා යැයි පිරිසට පවසා තිබූ ඉහළ පෙළේ රජයේ නිලධාරියාට අයත් එකක් දැයි විමසන විට එම අදහස පිළිගෙන හෝටලයේ රැඳී සිටි පුද්ගලයා පිරිස සමග කතාබහ කරමින් සිටින විට හෝටලයේ හිමිකරු ළඟ දී හෝටලයට පැමිණියේ දැයි සාදයේ සංවිධාන කටයුතු භාරගත් පුද්ගලයා නැවතත් විමසන විට හෝටලය හිමි එම නිලධාරියා තමන් බව එම පුද්ගලයා පිරිසට පවසා ඇත.
එම පුද්ගලයාගේ පිළිතුරත් සමග අන්දමන්ද වූ පිරිස මුහුණෙන් මුහුණ බලාගෙන  හෝටලය තම සාදයට වෙන් කිරීම පසෙක තබා එම ස්ථානයෙන් පිටව ගොස් ඇත.
සිය මිතුරාගේ වහසි බසට දොස් පවරා පසුදින සිය උපන් ගමේ තවත් මිතුරකුගේ නිවසක සාදය පැවැත්වීමට කටයුතු කර ඇති මිතුරන් පිරිස අතරට හෝටලයේ සාදය සංවිධානය කළ පුද්ගලයා පැමිණීම මගහැර තිබෙන බවත් සිය මිතුරන්ගේ උසුළු විසුළු ඉවසා ගැනීමට නොහැකිව සිය ජංගම දුරකතනය පවා ක්‍රියා විරහිත කර නිවස තුළටම වී කාලය ගත කරන බව දැනගන්නට ඇත.

 හේවාහැට එම්. දසනායක