අධික ලෙස මත්පැන් පානයට ගිජුවීම හේතුවෙන් ඇති වූ පපුවේ දැවිල්ල උත්සන්න වීමෙන් රජයේ රෝහලක ප්‍රතිකාර ලබමින් සිටි සිය මාමණ්ඩියගේ රෝගයට උචිතම ප්‍රතිකාරය මත්පැන් උගුරක් බීමට දීම බව පවසමින් බලහත්කාරයෙන් ඔහුගේ ටිකට් කප්පවාගෙන නිවසට රැගෙන ගිය බෑනා කෙනකු පිළිබඳ පුවතකි.
සිද්ධිය මෙසේය.
පසුගිය දිනෙක රාත්‍රී කාලයේ පුද්ගලයකු අධික පපුවේ දැවිල්ලක් ඇතැයි පවසමින් පළාතේ පිහිටි රජයේ රෝහලකට පැමිණියේ ඒ සඳහා ප්‍රතිකාර ගැනීමටය.
ඔහුට පරීක්ෂණ ගණනාවක්ම සිදුකළ රෝහල් කාර්ය මණ්ඩලය අවශ්‍ය බෙහෙත් හේත්  ලබා දුන්නේ ඉතා සුළු වේලාවකින්  රෝගියාට  යම් අස්වැසිල්ලක් ලබා දෙමිනි.
ඒ වන විටත් හොඳ හැටි මධු විතෙන් සප්පායම්ව සිටි රෝගියාගේ  බෑනණ්ඩියද ඔහු සමගම රෝහලේ නතර වූයේ රෝගියාට අවශ්‍ය ඇප උපස්ථාන ලබා දීමටය.
ප්‍රතිකාර ලබා දී හෝරා දෙක තුනක් ගෙවෙද්දී රෝගියා යම් තරමක සුවයක් ලැබූවත්  එය මධු විතෙන් සප්පායම්ව සිටි බෑනණ්ඩියට විහිළුවක් වෙමින් තිබිණි.
සුවය ලබමින් සිටි සිය මාමණ්ඩිය දෙස බලමින් විවිධ විහිළු කතා කියන්නට වූ බෑනණ්ඩිය අවසානයේ රෝහල් කාර්ය මණ්ඩලයට කියා සිටියේ ‘‘ඕකට ඉස්පිරිතාලෙ බෙහෙත් හරියන් නෑ එළියට ගිහිල්ලා දෙකක් දා ගත්ත නම් රජෙක් වගේ ඉන්න පුළුවන්’’ යනුවෙනි.
මාමණ්ඩිය මැදියම් රැයේම රෝහලෙන් පිටතට රැගෙන යා යුතු බව පවසමින්  හෙතෙම  රෝහල්  කාර්ය මණ්ඩලයට ද එක දිගට කරදර කරන්නට වූයේ’’ ඔවුන්ගේ රාජකාරිවලටද බාධා වන ලෙස හැසිරෙමිනි.
මත්පැන් පෙරේතයකු වූ මාමණ්ඩිය ද සිය බෑණාගේ කතාව එකහෙලා අනුමත කළේ  කිසිදු පැකිළිමකින් තොරවමය.
කොතෙක් කරුණු පැහැදිලි කළද අවසානයේ කාර්ය මණ්ඩලයේ උපදෙස් මායිම් නොකළ මාමාත් බෑනාත් වෛද්‍ය අවවාදවලට විරුද්ධව රෝහලෙන් පිටව යන බව පවසමින් රෝහල් කාර්ය මණ්ඩලයට සමු දුන්නේ යාබද    තිප්පොෙළන් දෙක තුනක් දාගෙන මහ රෑම නිවසට යන බව පවසමිනි.

වියලුව වාර්තාකරු