කරන්දෙණිය එම්.සුසිල් පියන්ත
පොලීසියටත් කොටු කර ගන්න බැරිව සිටි  පන්සලේ පොඩි හාමුදුරුවන්ගේ ජංගම දුරකතනය සොරකම් කළ සොරදෙටුවා අපූරු උපක්‍රමයක් භාවිතා කරමින් ළඟටම ගෙන්වා ගෙන පොලීසියට භාරදුන් තරුණයකු පිළිබඳ පුවතක් කොස්ගොඩ දූවේමෝදරින් අසන්නට ලැබේ.
පොඩි හාමුදුරුවන් එදා කොළඹ පන්සලකට වැඩියේ හිතවත් හිමි නමකගේ ආරාධනාවක් පිටය. එම විහාරස්ථානයේ පැවති පින්කමකට සහභාගිවීමටය. එසේ කොළඹට වැඩි උන්වහන්සේගේ රුපියල් ලක්ෂ දෙකක් පමණ වටිනා ජංගම දුරකතනය කිසිවකු විසින් සොරකම් කර ගනු ලැබීය.
ඒ සම්බන්ධයෙන් සැක කෙරුණේ එදා විහාරස්ථානයේ පිංකමට උදව් පදව් කළ තරුණයෙකි. අපේ පොඩි හාමුදුරුවෝ මේ සම්බන්ධයෙන් කොළඹ පොලිසියක පැමිණිල්ලක් ද දැමූහ. පලක් වූයේ නම් නැත.

මේ පිළිබඳව පොඩි හාමුදුරුවන්ගේ හිතවත් තරුණයකුට දැන ගන්නට ලැබුණි. ඔහු ඒ සඳහා යෙදූ අපූරු උපක්‍රමයත් සමගම පොඩි හාමුදුරුවන්ගේ ජංගම දුරකතනය සොරකම් කළ තරුණයා මේ ඊයේ පෙරේදා කොස්ගොඩ ප්‍රධාන හෝටලයකට එන්නේය. ඒ එහි රැකියාවක් කරන ගමන්ම තමන් මුහුණු පොතෙන් හඳුනාගත් පෙම්වතිය සමග පෙම් කිරීමටය. එයින් නොනවතින හේ කොස්ගොඩ සිට විදෙස් රැකියාවකට ගොස් මුහුණු පොතේ හඳුනා ගත් තරුණිය සහේට ගෙන අලු‍ත් දිවියක් පටන් ගැනීමටය.
කොස්ගොඩ හෝටලයට පැමිණි මේ තරුණයා පෙම්වතිය කියූ පරිදි එහි ලොකු මහත්තයා හමුවීමට එහි රැදී සිටියේය. මේ ගමනට අදින ඇඳුම් පැළඳුම් ද ඔහු පෙම්වතියට මුහුණු පොත හරහා දැනුම් දී තිබිණ. ඔහු කවදාවත්ම නොදුටු පින්තූරයෙන් පමණක් දැක තිබූ පෙම්වතියගේ මුහුණ  සැබැවින්ම දැක ගැනීමටත් ඇයගේ මැදිහත්වීමෙන් හෝටලයේ රැකියාව ලබා ගැනීමටත් නොතිත් ආශාවෙන් සිටියේය.

 ඔහු හෝටලයට පැමිණි විගසම තරුණියක් කෙසේ වෙතත් තරුණයෝ පිරිසක් පැමිණියහ. එම තරුණ පිරිස මේ තරුණයාගේ වංහුං අසා ගත්හ. ඔහු සිතූවේ මේ සිය පෙම්වතියගේ හිතවත් පිරිසක් කියාය.
තරුණ පිරිසගෙන් කණ හරහා දෙක වදින කොට තමා පොඩි හාමුදුරුවන්ගේ ජංගම දුරකතනය සොරකම් කළ බව පිළිගත්තේය. තමා කොටුවී ඇත්තේ එසේ මෙසේ උගුලක නොවන බව දැනගත් මේ තරුණයා තමා කළ සියලු‍ම සොරකම් ටිකද වැමෑරුවේය. ඒ සමගම ඔහු කොළඹ පොලීසියකට භාරදීමට ද මේ තරුණ පිරිස කටයුතු කළහ.
මේ තරුණයා එදා රැඳී සිටි පන්සලේ සී.සී.ටී.වී.වලින් ලබාගත් ඡායාරූපයක් අනුව ඔහු මුහුණු පොතේ සිටින බව කොස්ගොඩ තරුණයා සොයා ගත්තේය. ඒ විතරක්ම නොව ඔහු තරුණියක මෙන් ඔහු සමග මුහුණු පොත හරහා අපූරු යහළුකමක් ගොඩනගා ගත්තේය.
එය ප්‍රේම වෘත්තාන්තයක් දක්වාම ගෙනයාමට ඔහු ඔහුව පෙළඹවූවේය. ඒ විතරක්ම නොව ඔහුගේ ඉදිරි සැලැස්මද හෙළි කර ගත්තේය. විදෙස්ගතවීමට අපේක්ෂාවෙන් සිටින බවත් එතකම් හෝටලයක රැකියාවක් කිරීමට අපේක්ෂාවෙන් සිටින බවත් ඔහුගේ කටින්ම දැන ගත්තේය. ඒ අනුව තමාගේ පියා හඳුනන කොස්ගොඩ හෝටලයක  ලොක්කෙක් සිටින බව මුහුණු පොතට තරුණියක් වූ කොස්ගොඩ තරුණයා ඔහුට දැනුම් දුන්නේය. කොස්ගොඩ හෝටලයක වැඩට පැමිණිය හොත් පෙම් කිරීමට හැකි ආකාරයද කියමින් ඔහුව වල්මත් කළේය. ඔහු කොස්ගොඩට පැමිණියේ මේ අරමුණු සියල්ලම සාක්ෂාත් කර ගැනීමටය.