(කරන්දෙණිය - එම්. සුසිල් ප්‍රියන්ත)
නෑනලා ස්වයං නිරෝධායනයේ සිටියදී මස්සිනාලාට රජ මගුල් උදාවූ අපූරු කතාවක් පිළිබඳ පුවතක් දකුණු පළාතෙන් අසන්නට ලැබේ.

කොවිඩ්-19න් ඍජු ආශ්‍රිතයන්වීම නිසා නෑනලාගේ පවුලම ස්වයං නිරෝධායනයට යොමු කෙරුණේ ඔවුන් නොසිතූ මොහොතකය. මේ නිසාම ගෙදරට අවශ්‍ය අඩුමකුඩුම ද ඒකරාශි කරගන්නට ඔවුනට වේලාවද නොමැතිවිය. මේ නිසාම ඔවුන් පත්වූයේ දැඩි අසීරුතාවකටය.

මෙයට පිළියමක් ලෙස මේ නෑනා නැගණියගේ සැමියාගේ අතට සිය බැංකු පෙට් කාඩ්පත පත් කළේ එහි රහස් අංකයද ලියාදෙමිනි. ඇය තමාගේ නැගණියගේ ස්වාමි පුරුෂයා පිළිබඳව පූර්ණ විශ්වාසය තැබුවාය.  දෙන්නම් කාසිවලට සිය අවශ්‍යතා මස්සිනා ලව්වා කරවා ගැනීමට නොහැකිව තිබුණේ ඔවුන්ද එදාවේල පිරිමසා ගත්තේ ඉතා අමාරුවෙන් නිසාය.

නෑනා විසින් කරන ලද ඉල්ලීම අනුව මස්සිනා පෙට් කාඩ්පත උපයෝගී කොටගෙන ඇයගේ නිවසටම අවශ්‍ය බඩු මුට්ටු ගෙනත් දුන්නේ මහත් උනන්දුවකිනි. උද්යෝගයකිනි. සැබෑම ඥාති සෙනෙහසක් අනුව මේ දේවල් කරන බව සිතූ නෑනා සිය අවශ්‍යතා සපුරන මස්සිනාට නිතර දෙවේලේ පින් දුන්නාය. ඔහුට දීර්ඝායුෂ ප්‍රාර්ථනා කළාය.

නෑනලාගේ ස්වයං නිරෝධායන කාලය මේ සමගම නිමාවට පත්විය. ඒත් මස්සිනා ඇගේ බැංකු පෙට් කාඩ් පත දෙන පාටක් නොපෙනෙන නිසා ඇයට එය ඉල්ලා ගැනීමට සිදු විය. 

 මුදල් අවශ්‍යතාවකට නෑනා බැංකුවට ගොස් සිය පෙට් කාඩ් පතින් මුදල් ගැනීමට ගොස් බලන විට එහි මුදල් කිසිත් නැති බව දැන ගත්තාය. ඒ පිළිබඳව ඇයට ඔහුගෙන් නොවිමසීමට හේතු දෙකක් තිබිණි. ඉන් එකක් එක කුස උපන් සිය සහෝදරිය නිසාය. අනෙක තමන්ලා ස්වයං නිරෝධායනයේ යෙදී සිටියදී වෙනත් කිසිදු නෑයකු දුකසැප බලන්න නොපැමිණි අවස්ථාවේදී ඔහු තමන්ලාට කළ උදව්පදව් නිසාය.

තමන්ගේ ස්වයං නිරෝධායන කාලයේදී මස්සිනා සෑමදාම පාහේ අඩිපුඩි ගසමින් සොමි බර ජීවිතයක් ගත කළ බව පසුව නෑනාට ආරංචි වූයේ කරගත් මෝඩකමට බෙහෙත් නැතැයි පසක් කරමිනි.