(තිහගොඩ උපසේන ලියනගම)
අඩු මුදලකට පොල් ගෙන ඒමට ගිය රජයේ ලිපිකරුවකුට එළොව පොල් පෙනීමේ අපූරු සිදුවීමක් ඉකුත්දා අසන්නට ලැබුණේ මාතර දිස්ත්‍රික්කයේ උපනගරයක් ආශ්‍රිත ගම්මානයකිනි.

රජයේ දෙපාර්තමේන්තුවක ලිපිකරුවකු වූ ඔහු සවස සේවය නිමකොට සිය යතුරුපැදියෙන් ගෙදර ආ සැණින් සිය හිසෙහි වූ හෙල්මටය පුතාට දී මුව වැස්මද බිත්තියේ එල්ලා ඇඳුම් මාරු කර ගැනීමට සූදානම් වුවත් කාමරයට එබුන බිරිඳ කීවේ ගෙදර පොල් ගෙඩියක්වත් නැති නිසා ඇඳුම් මාරුනොකොට ඔහොමම කඩේ යන ලෙසටය.

‘‘උඩහ ගෙදර අක්කා කිව්වා හන්දියේ පොල් ලාබෙට තියෙනවා කියලා. තිබුණොත් ගෙඩි දහයක්ම ගේන්න කියා ඇය රුපියල් දාහේ නෝට්ටුවක්ද ඔහුට දිගු කළාය.

යළි හෙල්මටය සෙවීමටත් මුව අාවරණය පැළඳීමටත් ඒවා තිබූ තැන්, සොයන විට බිරිඳ කීවේ ‘‘මේ හවස් වෙලාවෙ ඕව බලන්න කවුරුවත් නෑ. යන්නකො අනේ’’ කියාය.

කලබලයේ යළි කමිසය දමාගත් ඔහු වෙළඳසැලට ගියත් ලාබ පොල් වෙළෙන්දා එහි නොවීය. ඔහු ආපසු ඒමට හැරුණා පමණකි.
පොලිස් නිලධාරීන් දෙදෙනකු ඔහුගේ යතුරුපැදිය නවත්වා හේතු කීපයක් කියා දී රුපියල් දාහක දඩ කොළයක් ලිව්වේය.

බිරිය දුන් දාහේ කොළය ඒකට හිලව් කළ ඔහු අඳුනන කඩයකින් පොල් ගෙඩියක් දෙකක් ණයට ගෙන ආවේ මොනවා කිව්වත් බිරිඳගෙන් සමාවක් නොලැබෙන බව දන්නා නිසාලු.