(මීරිගම විශේෂ පුෂ්පකුමාර මල්ලවආරච්චි)
නිසි වයස් පිරී දරුවා පෙරපාසලට බාර දී මාස කිහිපයක් ගතවනතුරුත් අකුරු කියවීමේ නැකැත ලබා නොදුන් නැකැත්කරුවකු පිළිබඳව බස්නාහිර පළාතේ ගම්මානයකින් වාර්තා විය.

සුන්දර ගම් පියසකි. එහි තරුණ යුවළකි. එකම දරුවා බහ තෝරන්න පටන්ගත් සමයේදීම ආසන්නයේ වෙසෙන නැකැත්කරු හමු වී දරුවාට අකුරු කියවන්නට සුබ නැකැතක් සාදා දෙන ලෙස ඉල්ලා සිටියේය. දරු‍වාගේ වේලාපත්කඩය ද ඔහුට බාර දුන්නේය.

දරුවාගේ වයස අවුරුද්ද දෙක ඉක්මවන්නට විය. කල් යල් ඇතිව නැකැත සාදා දෙන ලෙස ඉල්ලා සිටියත් එය ලබාදීම දිනෙන් දින කල් ගියේය. දරුවාට වයස අවුරුදු හතර පිරෙන්නටත් ළඟය. නැකැත තවම නැත. ‘ඉක්මනින් දෙනවා’ නැකැත්කරු කීය. මේ අතර දරුවා පෙරපාසලට බාරදෙන්නට දින නියම විය. මව තමන්ට හැකි අන්දමින් දරුවාට අකුරු කියෙව්වාය. කොරෝනා මැද්දේම දරුවා පෙරපාසලට ද බාර දුන්නාය. 

මේ මව දරුවා පෙරපාසලට කැඳවාගෙන යද්දී නැකැත්කරු හමුවිය. ඔහු නොදැක්කා වගේ මගහැර ගියේය. එදින සවස නැකැත්කරු ඔවුන් සොයා නිවෙසට ගියේය. ‘මොන්ටිසෝරියේ අකුරු කරන්නේ නැහැනේ. ඉස්කෝලෙට බාරදෙන්න ඉස්සර වෙලා අකුරු කියවන්න හොඳ නැකැතක් හැදුවා’ යැයි කියද්දී මවගේ හා පියාගේ ගෝරනාඩුව මැද නැකැත්කරු ආපසු හැරුණේ තමන් මේ ගමන එන්නට පෙර සුබ නැකැතක් නොබැලූ බව සිහිපත් කරගනිමිනි.