හබරාදූව ඩී.එච් රම්‍යා
දියේ ගිලුණු දරුවකු බේරා ගැනීමට ලාංකිකයන් කිසිවකු ඉදිරිපත් නොවුණු අවස්ථාවක විදේශීය තරුණයකු මුහුදට පැන බලවත් පරිශ්‍රමයක් දරා ඔහු බේරා ගැනීමේ සිද්ධියක් කොග්ගලට නුදුරු වැල්හේන්ගොඩ ප්‍රදේශයෙන් වාර්තාවේ.
සිද්ධිය සැකෙවින් මෙසේය.
දුර බැහැර ප්‍රදේශයක සිට පැමිණ දරුවෙකු ඥාතීන් පිරිසක් සමඟ මුහුදේ දිය නාමින් සිටියේය. එකවරම රළ පහරකට හසුවී දරුවා ඈතට ගසා ගෙනයන්නට විය. ඥාතීන් මරළතෝනිදී කෑගැසුවත් බේරා ගැනීමට ඉදිරිපත් වූයේ නම් කිසිවකු නොවේ. 
කෑගැසිල්ල ඇසී ගම්වාසීහුද ඒ ස්ථානයට දිව ආහ. දරුවා බේරා ගැනීමට කිසිවකු ඉදිරිපත් නොවන තැන එකවර මුහුදට පැන්නේ සිය පෙම්වතිය සමඟ මුහුදු වෙරළේ සිටි විදේශික තරුණයෙකි. ඔහු දරුවා වෙත පීනා ගොස් ඔහු රැගෙන නැවත ගොඩට පීනන්නට වුවත් එකවරම යළිත් රළ පහරකට හසුවූ දෙදෙනාම වෙන් වූයේ කිසිවකුත් බලාපොරොත්තු නොවූ ආකාරයටය.
විදේශීය තරුණයා ප්‍රයත්නය අතහැර දැමුවේ නැත. යළිත් දරුවා වෙත ගොස් ඔහු තදින් අල්ලා ගෙන ගොඩබිම දෙසට පීනන්නට විය. ඒ අවස්ථාවේදී ඔහුගේ ප්‍රයත්නය සාර්ථක විය. දරුවා විදේශික තරුණයාත් දෙදෙනාම සුරක්ෂිතය. ඔවුහු ගොඩබිමට පැමිණියහ. 

විදේශීය තරුණයා දරුවා රැගෙන එද්දී ගොඩබිමේ සිටි සියලු‍ දෙනා අත්පොළසන් දුන්නේ ඔහුට ගෞරවයක් වශයෙනි. දරුවාට වතුර පෙවී තිබූ හෙයින් එම වතුර ඉවත් කිරීමට සහ මූලික ප්‍රතිකාර සේවා ලබාදීමට ගම්වාසීන්ට පෙර කටයුතු කළේද එම සුදු ජාතික තරුණයාය. ඔහු විදේශ රටක ආරක්ෂක අංශයකට සම්බන්ධ තරුණයකු බව ගම්වාසීන්ට පසුව දැනගන්න ලැබිණ.
රැස්ව සිටි පිරිස විදේශීය තරුණයා වැළඳගෙන මේ මහා පින්කම වෙනුවෙන් ඔහුට ස්තූතිය පුද කළේ මහත් සෙනෙහසින් යුතුවය. ඉන්පසුව ගම්වාසීහු සුදු ජාතික තරුණයාට සහ ඔහුගේ පෙම්වතියට අපූරු සංග්‍රහයක් ලබාදීමටද අමතක නොකළහ. එය කොස්, දෙල් මඤ්ඤොක්කා, අල, බතල සමඟ පොල් සම්බල් සංග්‍රහයකි. එම සංග්‍රහය භුක්ති විඳි විදේශීය යුවල ඒ ස්ථානයෙන් සමුගත්තේ සියලු‍ දෙනාගේ ගෞරවාචාර මධ්‍යයේය.
ඉන් නැවතුණේ ද නැත.
ප්‍රදේශයේ ත්‍රිරෝද රථ රියදුරෝ යුවළ නොමිලේම තරමක දුරින් පිහිටි ලැගුම්හල වෙත රැගෙන යෑමට ස්වේච්ඡාවෙන් ඉදිරිපත්වී කටයුතු කළහ.