හේවාහැට – එම්. දසනායක

පාසල නිමවා සිය බාල වයස්කාර දරුවා සමග බසයෙන් නිවස බලා ගමන් කරමින් සිටි මවකට නිවස ආසන්නයේදී බසයෙන් බැස යනවිට තම දරුවා අමතකව ගිය පුවතක් හේවාහැට ප්‍රදේශයේ ගම්මානයකින් වාර්තා වේ.
සිද්ධිය සැකෙවින් මෙසේය.
මහනුවර නගරයේ සිට සවස් කාලයේ සිය ගමනාන්තය වෙත ළඟා වීම සඳහා අදාළ බස්රථය පිටත්ව ඇත. පාසල් නිමාවන වේලාව නිසාම මෙම බස් රථයේ දරුවන් විශාල පිරිසක් ගමන් කරමින් සිට ඇත.
සිද්ධියට මුහුණ දුන් දරුවා හා මව අතරමගදී බසයට ගොඩවී ඇතත් ඔවුන්ට අසුන් ගැනීමට ලැබී ඇත්තේ ආසන දෙකකය. බසයේ අසුන්ගත් වෙලේ සිට මව සිය ජංගම දුරකථනය වෙත අවධානයෙන් සිට ඇති අතර වෙනත් අසුනක සිටි දරුවාට සිය අසුන මතම හොඳින් නින්ද ගොස් ඇත.

බස් රථයේ අසුන මත හොඳින් නිදාගෙන සිටින දරුවා තම නිවස පසුකර කිලෝමීටර් භාගයක පමණ දුරක් පැමිණි පසුව දරුවා පිළිබඳව අවධානය යොමු කළ බස් රථයේ රියැදුරු හා සහායක දෙපල දරුවා ඇහැරවා බසින ස්ථානය පිළිබඳව විමසන විට දරුවා එක්වරම අවදිවී බස් රථය පුරා ඔබ මොබ ඇවිද සිය මව බසයේ ඇතිදැයි විපරම් කර ඇත.
පාසල නිමවීමෙන් පසුව තමා සමග බසයට ගොඩවූ මව බසය තුළ නොමැතිවීම නිසා බියට පත්වූ දරුවා පිළිබඳව අවධානය යොමු කළ බස් රථයේ සේවක මහතුන් දෙපල දරුවා ආරක්ෂිතව නැවතත් සිය මවට භාරදීමට අවශ්‍ය පියවර ගෙන ඇත.