හසලක සුනිල් ඒකනායක

සිය දරුවා පෙනී සිටින විභාගයෙන් පාස් කර නොදෙන්නැයි දෙවියන්ට පවසා සිටින ලෙස දේවාලයක කපු මහතෙකුගෙන් ඉල්ලා සිටි පියකු පිළිබඳ පුවතක් හසලක පොලිස් වසමේ එක් ගම්මානයකින් වාර්තාවිය.
තිස් දෙහැවිරිදි දෙදරු පියකු වන ඔහු ගොවිතැන් බතින් සිය පවුල නඩත්තු කරනු ලබයි. ඔහුගේ වැඩිමල් දියණිය එක්තරා විභාගයකට පෙනී සිටීමට නියමිතය.
එම දියණිය විභාගය සමත් වුවහොත් මවගේ අපේක්ෂාව වන්නේ ඇය නගරයක පිහිටි උසස් පාසලකට ඇතුළත් කිරීමටය. ඒ වෙනුවෙන් ඇය දියණිය දිරිගන්වනවා පමණක් නොව ගමේ දේවාලයට පවා ගොස් දෙවියන් ඉදිරියේද කන්නලව් කරන්නේ තම දියණිය මේ විභාගයෙන් උසස් ලෙස සමත් කරවා දෙන්න දේව කරුණාව ලබාදෙන ලෙසයි. එහෙත් තම දියණිය නගරයේ පාසලකට යවනවා තියා ඇයගේ අධ්‍යාපනයට අවශ්‍ය පොත් පත් පන්ති ගාස්තු පමණක් නොව වෙනත් අවශ්‍යතා සඳහාවත් විය පැහැදමක් කිරීමක් හෝ එයට සහයෝගයක් නොදක්වන්නට තරම් පියා අකාරුණික වී තිබේ. එයට විශේෂ හේතුව බවට පැවසෙන්නේ දරුවා නගරයේ පාසලකට ගියහොත් විශාල මුදලක් ඒ සඳහා වියදම් කිරීමට සිදුවන හෙයින් බවද කියයි.

මෙදින දරුවාගේ මව සැමියාට පැවසුවේ හෙට සවස අසවල් දේවාලයට දරුවත් රැගෙන තමන් යන බවත්, එයට අවශ්‍ය මුදලක් ලබාදෙන ලෙසත්, තමන් එනතුරු තම දෙහැවිරිදි කුඩා පුතා සමඟ නිවසේ රැදි සිටින ලෙසත්ය. මෙය කන වැකුණත් ඔහු එය නෑසුනාසේ සිටියේ ඒ සඳහා ඔහුගේ දැඩි අකමැත්ත නිසාවෙනි. 
පසු දින සවස තම දියණිය සමඟ අදාළ ගමේ දේවාලයට ගිය විට කපු මහතා දරුවාට ආශිර්වාද කර විභාගය උසස් ලෙස සමත් වේවායි ප්‍රාර්ථනයක්ද කළ අතර, මේ දරුවාගේ අධ්‍යාපන කටයුතුවලට පියා දක්වන උනන්දුව ගැන විමසා සිටියේය. ඇය තම සැමියා ඒ පිළිබඳව උනන්දුවක් නොදක්වන බවත්, මැයගේ සමත් වීමට ඔහු අකමැති බවත් ඇය පැවසුවාය.
කිව්වට තරහා ගන්නවත් මෙය මහත්තයාට නොකියන ලෙසත් පැවසු කපු මහතා සඳහන් කළේ, දරුවාගේ පියා අද උදේ දේවාලයට පැමිණ තම දරුවා විභාගයෙන් සමත් නොකර දෙන්නැයි දෙවියන්ට පවසා සිටින ලෙසත් කියා තමන්ට පැවසු බවය. එම ඉල්ලීමට වඩා දරුවකුගේ ඉදිරි ගමනේ අනාගතය තමන් හොඳින් දන්නා හෙයින් එම ඉල්ලීම ඉවත දමා දරුවා විභාගයෙන් සමත් කර දෙන ලෙස තමන් මේ අවස්ථාවේ දෙවියන්ට කන්නලව් කළ බවද කපු මහතා පැවසීය.