තමා අධ්‍යක්ෂ මණ්ඩල දීමනා නොගන්නා බවට රට්ටුන් රවටා අපූරු උපක්‍රමයක් භාවිතා කරමින් අධ්‍යක්ෂ මණ්ඩල දීමනා ලබාගත් සමුපකාර සමිති උපසභාපතිවරයකු පිළිබඳ කතාවක් දකුණේ සමුපකාරයකින් අසන්නට ලැබේ.
මිනිහට අවශ්‍ය කැපී පෙනෙන්නය. තමා වැඩකාරයා යයි පෙන්වීමටත් ඔහු නොගන්නා උත්සාහයක් නැතිතරම්ය. එමෙන්ම සමුපකාරයේ උපසභාපති වුවද කිසිදු දීමනාවක් ලබා නොගන්නා බවට ඔහු විශාල ප්‍රචාරයක් ගෙන ගියේය. එය ඒත්තු ගැන්වීමට විවිධ උපක්‍රමයන්ද යෙදවීය. බොහෝ අය එය පිළිගත්හ. ඉතාම සුළු පිරිසක් පමණක් ඒ ගැන දැන සිටියෝය.

ඒ ඒ සම්බන්ධයෙන් රාජකාරී කරන සමුපකාර සේවකයන් එක්කෙනෙක් දෙන්නෙක්ය. මේ අය මේ ගැන කට නෑරියේ උප සභාපතිවරයාගේ තරම දන්නා නිසාය. ඔහු තරහා වුවොත් නයා සේය. පහර දෙන්නේ පන්න පන්නාය.
අධ්‍යක්ෂ මණ්ඩල දීමනා මාසයෙන් මාසය ගෙවනු ලබයි. ඒ පොතක අස්සන් කිරීමෙන් අනතුරුවය. ඒ අනුව අනෙක් අධ්‍යක්ෂවරු දීමනාව මාසයෙන් මාසය පොතේ අත්සන් කර ලබා ගනිති. උපසභාපති එය නොගන්නේය. බාහිරෙන් බලන ඕනෑම කෙනකුට පෙනෙනුයේ ඔහු දීමනා ලබා නොගන්නා බවය. මෙය මෙසේ සිදුවන්නේය.
 මාස තුන හතරකට පසු මේ උපසභාපතිවරයා මේ සමුපකාර සමිතියේ වගකිවයුතු නිලධාරීන් හමුව කියනුයේ ගමේ පන්සලේ වැඩකට මුදල් දීමට අවශ්‍ය නිසා තමාගේ අධ්‍යක්ෂ මණ්ඩල දීමනා ලබාදෙන ලෙසය.
සේවකයෝ ඔහුගේ හිඟ මාස සියල්ලේම දීමනා එකතු කොට සාදා දෙති. මාසයෙන් මාසයට  දීමනා ගන්නවාට වඩා එකතු කොට ගන්නා විට මුදල ලොකුය. මේ ආකාරයට මාස තුන හතරකට වරක් ඔහු එක එක රටේම නැති බොරු කියා  දීමනාව ලබාගන්නේය. ඔහු එම මුදල් පන්සලට හෝ වෙනත් පොදු දෙයකට නොදී සිය වියදම සඳහා ප්‍රයෝජනයට ගන්නා බව දන්නෝ දනිති. නොදන්නෝ තවමත් නොදනිති.

කරන්දෙණිය එම්. සුසිල් ප්‍රියන්ත