(හක්මන විශේෂ - දෙනගම යසන්ත ආරියසේන)
වැඩිහිටි දීමනාව ලෙස ලැබෙන රුපියල් දෙදහසක මුදල ලබා ගැනීමට මෝටර් රථයකින් ගොස් වාහන කුලිය ලෙස රුපියල් එක්දහස් පන්සියයක් ලබාගත් පුද්ගලයකු පිළිබඳව දකුණු පළාතේ ග්‍රාමීය ප්‍රදේශයකින් වාර්තාවේ.

වැඩිහිටියකු සිය මාසික වැඩිහිටි දීමනාව ලබාගැනීම සඳහා යාමට ත්‍රිරෝද රථයක් සොයාගැනීමට දැඩි උත්සාහයක් දැරුවේය. ත්‍රිරෝද රථයක් සොයාගැනීමට නොහැකිව ආපසු නිවසට එමින් සිටි ඔහුට කාර් රථයක් හිමි අල්ලපු ගමේ සිටින හිතවතෙකු මුණගැසුණි. ආගිය තොරතුරු කතා කිරීමෙන් අනතුරුව සිය අවශ්‍යතාව හිතවතාට පැවසීමට වැඩිහිටියා වගබලා ගත්තේය.

වැඩිහිටියාගේ ඉල්ලීමට ක්ෂණිකව ක්‍රියාත්මක වූ හිතවතා ඔහුද නංවාගෙන කිලෝමීටර් දෙකක් පමණ දුරින් පිහිටි නගරයේ පිහිටි තැපැල් කන්තෝරුව අසලටම ගොස් වැඩිහිටියා බස්සවා දීමනාව රැගෙන එනතෙක්ද රැඳී සිටියේය. දීමනාවද ලබාගෙන එන ගමනේදී නගරයේ හෝටලයකින් දෙදෙනා තේ පානය කළ අතර එහිදී දුම්වැටි කීපයක්ද මිලදීගෙන හිතවතාට ලබාදුන්නේය.

මෝටර් රථයෙන් නිවස අසලින් බස්සවා යාමට සැරැසෙද්දී ‘පුතේ හයර් එකට කීයක් අවශ්‍ය දැ’යි වැඩිහිටියා විමසා සිටියේය. ‘මාමේ එක්දහස් පන්සියයක් දෙන්න’ යැයි හිතවතා පැවසීමත් සමග වැඩිහිටියාගේ හිස ගිනිගත්තේය. කිසිවක් කරතියාගත නොහැකිව අන්දමන්දව සිටි වැඩිහිටියා තම කමිස සාක්කුවේ ඉතිරිව තිබූ රුපියල් එක්දහස් හය සියයක මුදලින් රුපියල් එක්දහස් පන්සියයක් හිතවතාට ලබාදී ඉතිරි රුපියල් සියය සාක්කුවේ දමාගෙන ගෙදර ගියේය. තමන් මුහුණදුන් සිද්ධිය බිරිඳට පැවසීමත් සමග උරණ වූ බිරිඳ සැමියාටද බැනවදිමින් සිදුවීම අසල්වාසීන්ට පැවසීම නිසා කතාව ගමපුරා පැතිරයාමට වැඩි දිනක් ගත නොවීය.