(කරන්දෙණිය එම්. සුසිල් ප්‍රියන්ත)
නිවෙසේ තේ පානයට මාසයකට යන රුපියල් දෙතුන් සියයේ සීනි වියදම පියවීමට අලෙවි සලේ සීනි ගෝනිවලින් සීනි ඇද්ද තොග මුදලාලි කෙනකු සම්බන්ධ පුවතක් අපේ ගම්පළාතෙන් වාර්තා වේ.

අහල ගම් හතකටම තොග බඩු සපයන නගරයේ වෙළෙඳසලකි.මේ තොග වෙළෙඳසලෙන් ගමේ සිල්ලර වෙළෙඳසලකට ගෙන ගිය සීනි මිටියක තිබී හිස් කිරිටින් එකක් හසුවූයේ මේ ඊයේ පෙරේදාය. සිල්ලර වෙළෙඳසලේ මුදලාලි එම සීනි මිටියේ බර කිරුවේ ඇතිවූ සැකය නිසාමය. එහි නියම බරට වඩා කිලෝග්‍රෑම් එකකට වැඩියෙන් අඩුවෙන් තිබුණේය. වහාම සිල්ලර වෙළෙඳසල් හිමියා නගරයේ තොග වෙළෙඳසල් හිමියා මුණගැසෙන්න ගියේය. එහිදී තමාගේ සීනි මිටියේ තිබූ හිස් කිරි ටින් එක පිළිබඳවත් සීනි මිටියේ සීනි අඩු බවත් කීවේය.

 ගෝලයා දෙසට ඇඟිල්ල දික්කොට තොග වෙළෙඳසලේ මුදලාලි එකත් එකටම මේකා හොරට සීනි ඇදලා මතක නැතිව හිස් කිරිටින් එක ගන්නේ නැතිව සීනි ගෝනිය මහන්න ඇතියි කීවේය. මෙය ඇසූ ගෝලයාට යකා නැග්ගේය. ‘පට්ටපල් බොරු කියන්න එපා මුදලාලි, ඔයානේ ගෙදර තේ බොන්නයි කියලා මට කියලා සීනි අද්දව ගන්නේ’ යයි කීවේ ඔහුගේ ඇඳුම් සියල්ලම ගැලවෙන පරිද්දෙන් කතා කරමින්ය.

 ගමේ සිල්ලර වෙළෙඳසල් හිමියාට කරුණු කාරණා තේරුම් ගියේය. මාසයකට මේ තොග වෙළෙඳසලෙන් ලක්ෂ ගණනක  බඩු ගන්න ඔහු එදායින් පස්සේ මේ වෙළෙඳසල පැත්ත පළාතේවත් නොගියේය. එමෙන්ම තමන් දන්න මේ වෙළෙඳසලෙන් බඩු ගන්නා අනෙක් ගම්වල වෙළෙඳසල් හිමියන්ද මේ පිළිබඳව දැනුවත් කළේය.

 සිය වෙළෙඳසලෙන් බඩු ගැනීමට ගම්මානවල සිල්ලර වෙළෙන්දන් වෙනදා මෙන් නොඑනු දුටු තොග මුදලාලි සිය හාමිනේ සමග කීවේ මාසකයට යන රුපියල් සීය දෙසීයක සීනි මුදල පියවා ගන්න ගිහින් මා වැටුණු අමාරුවක තරම යයි කීවේ ගෝලයාටද ශාප කරමිනි.