මීරිගම විශේෂ පුෂ්පකුමාර මල්ලවආරච්චි

පරාජිත ජනාධිපතිවරණ අපේක්ෂකයකුගේ ආධාරකරුවකුට දුරකතනයෙන් කතාකොට රතිඤ්ඤා ඉල්ලීමේ සිද්ධියක් හේතු කොට ගෙන මිතුරු පිරිසක් විරසකවීමේ පුවතක් මීරිගමට නුදුරු රජ සමයක් හා බැඳුන ගම්මානයකින් වාර්තා විය.
නිතර එකට කල්ගත කරන අසල්වැසි මැදිවිය ඉක්මවූ පිරිසකි. මේ සමාගමයට හත් අට දෙනෙකු අයත්ය. ඔවුන්ගේ දේශපාලන අදහස් විවිධය. දේශපාලනය පිළිබඳව කරන කතා බහේදී ඔවුනොවුන් අතර දැඩි වාග් ප්‍රහාර එල්ලවුවත් ඒවා ඒ මොහොතට පමණක් සීමාවූයේ මිතුරු බැඳීම ප්‍රබලවූ නිසාය.
ජනාධිපතිවරණය අවසන්විය. මිතුරු පිරිස නිතර හමු වුවත් එක් සහෘදයකු පමණක් මේ සමාගමයට දින දෙකක් ම පැමිණියේ නැත. මිතුරු කල්ලිය ඔහුට විහිළුවක් කරන්නට ඉටා ගත්තේ ඔහු නියෝජනය කළ අපේක්ෂකයා පරාජයට පත් වී තිබූ නිසාය.

මිතුරු පිරිසේ දුරකතන අංක ඔහු හොඳින් දන්නා බැවින් වෙනත් දුරකතනයක් මගින් එක් මිතුරකු පරාජිත අපේක්ෂකයාගේ ආධාරකරුවකු වූ මිතුරාට ඇමතුමක් දුන්නේය. 
ව්‍යාජ නාමයක් භාවිත කරමින් කතා කළ මේ මිතුරා රතිඤ්ඤ ගෙනාපුවා තියෙනවා දැයි විමසුවේය. උඹ පරාද හින්දා ඔය රතිඤ්ඤා පත්තු කරන්න අපිට දියං ඇමතුම දුන් මිතුරා පැවසීමත් සමඟ පරාජිත අපේක්ෂකයාගේ ආධාරකරුවා කෝපයට පත් වූයේය.
දුරකතනය විසන්ධි කෙරිණි. ටික වේලාවකට පසු තමන්ට ඇමතුම ලැබුණු අංකයට ඔහු යළිත් ඇමතුමක් ගත්තේ ය. කුඩා දරුවකුගේ හඬ ඔහුට ඇසිණි. ඔය ළමයා මොකද මට විහිළුකරේ ඔහු ඇසීය. මම කරපු විහිළුවක් නෑ ළමයා කියද්දි පරාජිත අපේක්ෂකයාගේ ආධාරකරුවා යළිත් කේන්ති ගත්තේ ය. පරුෂ වචන ගිගුරුම් දුනි. විහිළුව කළ මිතුරු පිරිස මේ හබය ද අසා සිටියේ උද්දාමයෙනි.
කෙසේ හෝ තම ඇමතුමට පිළිතුරු දුන් ළමයා කවුදැයි ඔහු හඳුනා ගත්තේය .කඩිනමින් පැමිණියේ මිතුරු පිරිස කල් ගත කරන ස්ථානයටය. මාව විහිළුවට ගත්ත එකා මොකාද ඔහු ඇසීය.
මිතුරු පිරිස සිදු වූ දේ නොවලහා කියමින් විහිළුවක් පමණක් බවට කරුණු කීවත් ප්‍රති ඇමතුම ලබා දුන් අවස්ථාවේ ඒ බව නොකීවේ මන්දැයි විමසමින් ඔහු යළි කෝපයෙන් පුපුරමින් පිටව ගියේ තොපේ ආශ්‍රය මට ආයෙත් එපා කියමිනි.