(නිකවැරටිය - ප්‍රියානි මංගලිකා)
ගමේ කඩ පිලෙන් දිනපතා පුවත්පත බලා නවතම පුවත් ගම පුරා පතුරුවන ගමේ ගොවි මහතාට මෙදින ඇස් කණ්ණාඩිය අමතකව ඒම නිසා මුහුණ දීමට සිදුවූ අපූරු පුවතක් කුරුණෑගල දිසාවේ ග්‍රාමීය පෙදෙසකින් වාර්තා වේ.

සිද්ධිය මෙසේය.

සුපුරුදු ලෙස මෙදිනද මැදිවියේ ගොවි මහතා කඩ මණ්ඩියට ගියේ මෙදින පුවත්පතේ ඇති නවතම තොරතුරු දැන ගැනීමටය. කඩයට ගිය ගොවි මහතා කඩිමුඩියේ පත්තර පිටුවක් අතට ගත් සැණින් ඔහුගේ නෙත ගැටුණේ බස් රථයක රෝද උඩු අතට තිබෙන ආකාරයයි. එහෙත් අකුරු කියවා ගැනීමට නොහැකි වූයේ ඔහුට ඇස් කණ්ණාඩිය අමතකව ඒම හේතුවෙනි.

‘අප්පොච්චියේ බස් එකකුත් පෙරළිලා තියෙන්නේ. කී දෙනෙක් මැරිලා ද දන්නෑ. මට මේ කණ්ණාඩිය ගේන්න බැරි වුණා නේ. ‘අනේ පුතේ මේක කියවපංකෝ’ කියා ගොවි මහතා කඩයට පැමිණි තරුණයකුට මහත් සංවේගයෙන් කියා සිටියේය. පුවත්පත අතට ගත් තරුණයාට කාරණය වැටහිණි. ඔහුට සිනා පහළ විය.

‘මාමා මේක වෙළෙඳ දැන්වීමක බස් එකක්. මාමා පත්තරේ බලලා තියෙන්නෙ උඩයට මාරු කරගෙන. අනික් පැත්තටනේ.’

තරුණයාගේ එම පිළිතුරින් මහත් ලැජ්ජාවට පත්වූ ගොවි මහතා වහා කඩයෙන් එළියට බැස කඩිමුඩියේම යන්නට ගියේය. එහෙත් මෙම සිදුවීම ගම පුරාම පැතිර ගියේය. 

කොල්ලන් කුරුට්ටන් පවා ගොවි මහතා දකින විට ‘හා... බස් එකකුත් පෙරළිලා තියෙන්නේ’ යනුවෙන් උසුලු විසුලු කරන්නට වූයෙන් ගොවි මහතාට සිදුවූයේ මහත් අකරතැබ්බයකි.

ඉන්පසු ගොවි මහතා පුවත්පත් බැලීමට කඩ මණ්ඩියට යෑම හෝ ගම පුරා නවතම පුවත් මැවීම ද නොකළ නමුදු ගමේ කොල්ලන් කුරුට්ටන්ට සුද්ද සිංහලෙන් ඇමතීමට ගොවි මහතාට නිරන්තර සිදු වූයේලු.