රක්වාන - ඩබ්.ඒ. සිරිසේන

අටුව කඩා පුටුව හැදුවා වාගේ යැයි කියැවෙන කතාවට හා සමාන සිද්ධියක් පෙරේදා 9 වැනිදා රක්වාන පොලීසියෙන් වාර්තා විය.

සිද්ධිය මෙසේය.

ඔහු ත්‍රිරෝද රථ රියැදුරෙකි. රක්වාන නගරයේ කුලී රථ සේවාවේ යෙදෙන මැදි වියේ පුද්ගලයෙකි. පසුගිය දිනෙක ත්‍රිරෝද රථයේ තිරිංග අලුත්වැඩියා කිරීමට ගරාජයකට ගොස්, එය අලුත්වැඩියා කිරීමෙන් පසු, බිරිය සමග කන්දගම පිහිටි නිවෙසට යමින් සිටින අතරේ, එක්වරම ත්‍රිරෝද රථය ලිස්සා ගොස්, මාර්ගය අසල තිබූ නිවෙසක ගේට්ටුවක වැදී නතර විය.

ඒ මොහොතේ නිවැසියන් පැමිණ පරීක්ෂා කිරීමේදී දැක ඇත්තේ, ගේට්ටුවට තරමක හානියක් සිදු වී ඇති බවයි. 

හිතවත් අසල්වැසියකු වූ රියැදුරුට නිවැසියන් පවසා ඇත්තේ, ගේට්ටුව යළි සකසා දෙන ලෙසය. එයට එකඟ වී ඇති මෙම රියැදුරා එදින රාත්‍රියේම ගමට පිවිසීමට තිබූ එකම පාලමේ ඇන්දට සවිකර තිබූ පයිප්ප බට තුනක් කපාගෙන ගොස්, පසු දින ගේට්ටුව සකස් කිරීමට කාර්මිකයකු සමග සූදානම්ව සිටියේය.

අවුරුදු 75කටත් වඩා පැරැණි පාලමේ යකඩ බට කැපීම ගැන උරණ වූ ගම්වැසියන්ට බට හොරා ගැන ඉව වැටුණේ කිසිවකුත් නොසිතූ විදිහටය. පයිප්ප බට තුන සමග සැකකරු පොලීසියට බාර දෙන්නට ගම්මු පියවර ගත්හ.

අනතුරුව මේ සම්බන්ධයෙන් වූ විභාගය ඉකුත් 9 වැනිදා පොලීසියේදී පවත්වා ඇති අතර, ඒ සඳහා ගම්වැසියන් සමග ප්‍රාදේශීය සභාවේ නිලධාරීහු ද සහභාගි වී සිටියහ. එහිදී සැකකරු පවසා ඇත්තේ, අලාභහානි කළ ගේට්ටුව සහ පාලම් ඇන්දේ බට පෙර තිබූ පරිදිම සකසා දෙන බවයි.

ගම්වැසියන් සහ නිලධාරීන් ද එයට එකඟ වී, ගැටලුව සමථයකට පත් කරගත් බව රක්වාන පොලීසිය පැවැසීය.