පවිත්‍රා දේශානි 

කළු‍පොල් මාළු පිසින්න කළුපොල් ගෙඩියක් සොයන්න ගම වටේ ගිය තරුණයකු පිළිබඳ පුවතක් නාවලපිටියට නුදුරු ගම්මානයකින් වාර්තා වෙයි.
සිද්ධිය සැකෙවින් මෙසේය. 
සිදුවීමට සම්බන්ධ තරුණයා උසස් පෙළ හැදැරීම මඟින් නතර කොට සිටිනා ගැටවරයෙකි. කුඩා කල සිටම ඔහුගේ නිවහන වන්නේ ගමේ පන්සලයි. ගමේ පන්සලේ ලොකු හාමුදුරුවන් යටතේ දැනුම් තේරුම් ඇති වයසේ සිටම හැදී වැඩෙයි.
පන්සලේ පොඩි හාමුදුරුවන් දෙදෙනාත් මෙම තරුණයාත් එක වයසේ පසුවන්නෝය. එක වයසේ හෙයින් ගජ මිතුරන්ය. දවසක් දා මොවුන් තිදෙනාට කළුපොල් මාලු‍ සාදා කෑමේ ආසාවක් හටගෙන ඇත. තම ලොකු හාමුදුරුවන් වහන්සේගෙන් අවසර ගත් තිදෙනා ඊට අවශ්‍ය කොස්ඇට පන්සලේ වරකා ගසෙන් සපයා ගෙන ඇත.

දැන් ඇත්තේ කළුපොල් මාලුව පිසීමේ අවස්ථාවයි. ඔවුන්ට කළුපොල් මාලු‍වට අවශ්‍ය කරන කළුපොල් ගෙඩියක් වුවමනා වී ඇත. මේ පිළිබඳව පන්සලේ ලොකු හාමුදුරුවන්ගෙන් විමසූ අවස්ථාවේ සිද්ධිය තේරුම් ගත් උන්වහන්සේ දහම් පාසලේ ප්‍රධාන ආචාර්යවරියගේ නම පවසා ඇයගේ නිවසේ නම් කළු පොල් ඇතැයි පවසා ඇත.
ඉන්පසු කළුපොල් ගෙඩියක් රැගෙන එන්නට තරුණයා ප්‍රධාන ආචාර්යවරියගේ නිවසට පිටත් වී ඇත. ඇයගේ නිවසට පැමිණ  සිද්ධිය විස්තර කෙරූ තරුණයාට සිද්ධිය වැටහුණු ප්‍රධාන ආචාර්යවරිය  කළුපොල් මාලු‍ පිසිනා සැටි කියාදී එයට වෙනම කළුපොල් කියා පොල් වර්ගයක් නොමැති බවත් පහදා දී ඇයගේ නිවසේ පොල් ගසින් කැඩූ නැවුම් පොල් ගෙඩියක්ද දී නැවත පන්සලට පිටත් කර ඇත. එදා සිට ඔහු දකිනා ගම්වැසියකූ මල්ලි කළුපොල් ගෙඩියක් ගන්න නැතෙයි කියා ඇසීමට අමතක නොකරයි.