කලවාන උපේන්ද්‍ර ප්‍රියංකර ජාතුංගම
ගෝලයාගේ අත්වැරදීමකින් රෝගියකුගේ ඇඟේ කහඹිලියා තැවරී රෝගියාත්, වෙද මහතාත් රෝහල් ගත වූ පුවතක් සබරගමුව පළාතේ එක්තරා ගමකින් අසන්නට ලැබුණි.
සිද්ධිය මෙසේය.
එම වෙද මහතා ගමේ කැඩුම්බිඳුම් සුව කිරීම සම්බන්ධයෙන් නම ගිය පුද්ගලයකි.  ඔහුගේ ජනප්‍රිය බව නිසාම බොහෝ ඈත පළාත්වල රෝගීන් පවා ඔහු සොයාගෙන පැමිණෙති. ඉතා ඉහළ මිලක් අය  කළත් වෙදකම හොඳ නිසාත් ඔහුගේ නිවස රෝගීන්ගෙන් පිරී පවතී. මෙම වෙද මහතා ළඟ සිටින අත්උදව්කරුවා එතරම් උගත් පුද්ගලයකු නොවන අතර උදේ සිට නිදා ගන්නා  තුරු මත්පැන් පානය කරන්නෙකි. ලෙඩෙකුට අරිස්ට වෙනුවට අරක්කු දුන් සිද්ධියක් ඇරෙන්නට ඔහුගෙන් වෙනත් අත්වැරදීම් සිදු නොවූ නිසා හා කීයක් හරි දී සේප් විය හැකි නිසාද වෙද මහතා ඔහු ළඟම තබාගෙන තිබේ.

කෙසේ වෙතත් සිදුවීම වූ දින පිට පළාතක ලෙඩෙකු තුනටියේ ආබාධයක් නිසා ප්‍රතිකාර පිණිස පැමිණ ඇති අතර වෙද මහතා සිය ගෝලයාට පවසා  ඇත්තේ ගේ පිටුපස ඇති ගසෙන් කොළ ටිකක් කඩාගෙන  කොටා රැගෙන එන ලෙසය.
ප්‍රතිකාර පිළිබඳව යම් අවබෝධයක් ගෝලයාට ඇති බැවින් නිතර නිතර ඖෂධ පිළිබඳව ඔහු දැනුවත් කිරීම වෙද මහතා විසින් සිදු නොකරයි. ගෝලයා කොටාගෙන ආ කොළ වර්ගය තවත් ඖෂධ සමග රෝගියාගේ තුනටියේ තැවරූ වෙද මහතා ‘‘ටිකක් ඉන්න’’ යැයි පවසා වෙනත් රෝගියකුට ප්‍රතිකාර කිරීමට සැරසෙද්දී, තුනටියේ අමාරුවට ප්‍රතිකාර කළ පුද්ගලයා ගීත නොමැතිව අමුතු නර්තනයක් ආරම්භ කර ඇත්තේ තුනටියේ අමාරුව අමතක කරමිනි.
 බොහෝ අසීරුවෙන් අන් අයගේ වාරුවෙන් පැමිණි මෙම රෝගියාට සිය ඖෂධ වලින් මෙතරම් ඉක්මනින් ප්‍රතිඵල ආවේ කෙසේදැයි සිතමින් ඔහු වෙත උජාරුවට පැමිණි වෙද මහතා කොහොමද දැන් සනීපයි නේද විමසා තිබේ.
 ‘‘මොන සනීපයක්ද, මොනවද මගේ තුනටියේ ගෑවේ.’’ යැයි අසමින් රෝගියා තම නර්තනය වේගවත් කරමින් බිම පෙරළී ඇත. ගෝලයාගේ මුහුණ බැලූ වෙද මහතා තම අතද කසන බව දැනී ගෝලයා ගෙනැවිත් ඇත්තේ තමන් සිතූ  ඖෂධය නොව ගේ පිටුපස ඇති කහඹිලියා කොළ බව දැනගෙන විගසින් තුනටියේ අමාරු රෝගියා සමග රෝහල වෙත ගොස් ප්‍රතිකාර ලබා තිබේ.