උඳුගොඩ - වාර්තාකරු

කන්දක සිට පෙරළුන මුට්ටියක ශබ්දයකට බිය වී නායක් එනවා යැයි බියට පත්වී තේ දළු කැඩීම පසෙක දා දිවූ පිරිසකගේ කතා පුවතක් බුලත්කොහුපිටිය ප්‍රදේශයෙන් වාර්තා විය.
සිද්ධිය සැකවින් මෙසේය.
මෙම පිරිස කන්දක් පාමුල තේ දළු නෙළමින් සිටියහ. කන්ද සමීපයේ කාලයක පටන් පිරිසක් නීති විරෝධී කසිප්පු ජාවාරමක නිරතව සිටිති. කසිප්පු ජාවාරම් කරුවන් කසිප්පු පෙරීම් සිදුකිරීමට භාවිත කළ විශාල මුට්ටියක් මෙම කන්ද උඩ සඟවා තබා තිබුණි.

මේ ප්‍රදේශය තරමක් නාය යෑමේ අවදානමක් සහිත ප්‍රදේශයක් නිසා ඒ අවට වැඩපල කරන මිනිස්සු නිතරම නායයාම් කොයි මොහොතක ඒවි යැයි සැකෙන් ජීවත් වූහ. මෙම සිදුවීම වූ දින පිරිස තේ වත්තේ දළු කැඩීමට කන්ද පාමුලට ගියහ.
මොවුන් දළු කඩන අතර තුර රිළව් රංචුවක් ද මෙම කන්ද දෙසට ගමන් කළහ. ටික මොහොතකින් කන්ද උඩ තිබු විශාල යකඩ මුට්ටියක් දුටුව රිළව් රංචුව අර මුට්ටිය තුළ කෑම සොයන්නට පටන් ගත් සැනින් විශාල මුට්ටිය කන්දෙන් පහළට පෙරළී ගියේ විශාල ශබ්දයක් නගමිණි. ඒ අසල තේ දලු‍ නෙළමින් සිටි පිරිස ඕන්න නාය එනවෝ කියමින් පණ කඩා ගෙන දිව යන්නට වූහ. ඉන් පසුව ටික මොහොතකින් සෝදිසි කර බැලීමේදී මුට්ටිය දුටු විට ඔවුන්ට කාරණා තේරුම් ගොස් තිබුණි. නාය යෑමක් කියා මුට්ටියක් පෙරළීමෙන් ඇති වූ ශබ්දයට තම පිරිස රැවටුන බවය.