(හක්මණ විශේෂ දෙනගම යසන්ත ආරියසේන)
අනියම් පෙමක පැටලී සිටි රජයේ සේවක යුවළකට කොවිඩ් වයිරසය හේතුවෙන් මුහුණපෑමට සිදු වූ අපූරු අකරතැබ්බයක් පිළිබඳව දකුණු පළාතේ ග්‍රාමීය පෙදෙසකින් වාර්තා වේ.

විවාහක තරුණ නිලධාරි දෙපළක් එකම කාර්යාලයේ රාජකාරි කරමින් සිටියදී අසම්මත පෙම් හබයක් පටන් ගත්හ. 

පෙම්වතියගේ සැමියා රජයේ සේවකයකු නොවන අතර පෙම්වතාගේ බිරිය එම ආයතනයේ වෙනත් කාර්යාලයක සේවය කරයි. දෙදෙනාටම දූ දරුවන් ද සිටින අතර ඒ අයගේ කටයුතු නොපිරිහෙලා ඉටුකිරීමට ද දෙදෙනාම වගබලා ගත්හ.

පෙම්වතිය දිනපතා සිය පෙම්වතාට ද උදේ සහ දිවා ආහාරය රැගෙන එන අතර දෙදෙනාම ආපනශාලාවේ තබාගෙන අාහාර ගන්නා බව එම කාර්යාලයේ කා අතරත් නොරහසකි.

සංචරණ සීමා පැනවීමත් සමග දෙදෙනාටම සිය අවශ්‍යතා සිත්සේ සපුරා ගැනීමට අවස්ථාව උදා වී ඇති අතර, ආහාරපාන ගැනීම ද එකටම සිදු කළහ. පෙම්වතියගේ සැමියා සිදුකරන රැකියාව අනුව ඔහු විශාල වශයෙන් ජනතාව සමග ගැටීම හේතුවෙන් කොවිඩ් ආසාදිතයකු බවට පත්විය. සැමියා කොරෝනා ආසාදිතයකු හේතුවෙන් පෙම්වතිය නිරෝධායනයට යොමු කළේය.

කාන්තාවට සිදුකළ පී.සී.ආර්. පරීක්ෂණයෙන් ඇය ද ආසාදිතයකු වීම හේතුවෙන් ඇයගේ සමීපතමයකු ලෙස පෙම්වතා ද නිරෝධායනය කළේය. ඔහුට සිදු කළ පී.සී.ආර්. පරීක්ෂණයෙන් ඔහු ද අසාදිතයකු බවට පත්ව සිටියේය.

පෙම්වතාගේ බිරිය දැඩි ලෙස සෞඛ්‍ය උපදෙස් අනුගමනය කරමින් දරුවන් සහ නිවෙසේ අය ආරක්ෂා කළ පසුබිමක සැමියාට කොවිඩ් වැළඳීම ගැටලුවක් වීම නිසා ඒ පිළිබඳව ඇය විපරම් කර බැලු‍වාය. තම සොයුරියක මාර්ගයෙන් සැමියාගේ කාර්යාලයේ ඒ පිළිබඳව සොයා බැලීමේදී ඇයට සියල්ල හෙළි විය.

සැමියා කොරෝනා ප්‍රතිකාර මධ්‍යස්ථානයේ සිට නිවෙසට පැමිණෙන විට බිරිය දරු දෙදෙනා සමග මහගෙදර ගොස්ය. මේ වෙද්දී පෙම්වතා තනිවම නිවෙසේ ජීවත්වන අතර සිද්ධිය පෙම් යුවළගේ කාර්යාලයට ආරංචි වීමත් සමග ආයතන ප්‍රධානියා දෙදෙනා අවස්ථා දෙකකට සේවයට කැඳවීමට ක්‍රියා කළේය.

කොරෝනා බත කෑවා නම් දිරවාපන් සුදෝ කියා කතාවක් කාර්යාලය තුළ නිර්මාණය වීම නිසා සිද්ධිය වැඩි කාලයක් නොගොස් ප්‍රදේශය පුරා පැතිර යාම සිදු වූ බව ද පැවැසේ.