ඔහුගේ වයස අවුරුදු 26ක් වන අතර ඇයගේ වයස අවුරුදු 24කි. යාබද ගම් දෙකක පදිංචි ඔවුන් පාසල් වියේ සිටම පෙම්වතුන්ය. පාසල් අධ්‍යාපනයෙන් පසු ඔහු සූපවේදියකු ලෙස රැකියාවක් කරන්නට වූ අතර ඇයද කාන්තා ආභරණ වෙළෙඳ සලක් විවෘත කළාය. එහෙත් දෙදෙනාගේ ප්‍රේමයට ඇයගේ නිවසින් එල්ල වූයේ දැඩි විරෝධයකි. මව්පියන් සූදානම් වූයේ ඇය වෙනත් පුද්ගලයකුට විවාහ කරදීමටය. මෙය දැනගත් ඔහු ඇයගේ  නි​ෙවසට ගොස් මව්පියන්ට තර්ජනය කළේය.

මේ අතර ඇයගේ ඥාති සොහොයුරියක් හදිසියේ අසනීප වී ගාල්ල නගරයේ පෞද්ගලික රෝහලකට ඇතුළු කළ අතර ඇය සාත්තුවට ළඟ සිටියාය. ඥාති සොහොයුරිය සුවය ලබා ත්‍රිරෝද රථයක නැගී ඇය සමග නි​ෙවසට යාමට පිටත්වූවාය. ගාල්ල නගරයේ සිට ටික දුරක් යනවිට පසු පසින් පැමිණි වාහනයක් ත්‍රිරෝද රථයේ මග හරස්කොට නතර කළේය. එයින් බැස ගත් ඇයගේ පෙම්වතා ඇය ඇද තමා පැමිණි වාහනයට දමා ගත්තේය. ඥාති සොහොයුරිය නි​ෙවසට ගොස් සිද්ධිය කිවාය.

ඇයගේ පෙම්වතා ඇය හෝටල් කාමරයකට ගෙන ගිය අතර ඥාති සොහොයුරියගේ පියා පොලිසියට ගොස් සිද්ධිය පැමිණිලි කළේය. හෝටල් කාමරයට ගියත් ඔහු බලාපොරොත්තු වූ දේ ඉටුකර ගැනීමට ඇය ඉඩ දුන්නේ නැත. උදයේ පෙම්වතා ඇය විවාහ රිජිස්ටාර්වරයකු වෙත කැඳවා ගෙන ගියේය.

සාක්කි අත්සන් කිරීමට ඔහුගේ මිතුරන් කිහිප දෙනෙක්ද පැමිණ සිටියහ. මනමාල‍යාගේ පාර්ශ්වය වෙනුවෙන්ද මනාලියගේ පාර්ශ්වය වෙනුවෙන්ද අත්සන් කරනු ලැබුවේ මනමාලයාගේම මිතුරන් දෙදෙනෙකි. විවාහය ලියාපදිංචි කිරීමෙන් පසු දෙදෙනා යළිත් හෝටල් කාමරයට ගිය අතර මිතුරෝද විසිර ගියහ. පසුදින උදෑසනම ඔහු තම බිරිඳ සමග විවාහ සහතිකයත් රැගෙන පොලිසියේ පෙනී සිටියේය.

උණවටුන-ඩී.ජී. සුගතපාල