(කොබෙයිගනේ නිමල් ප්‍රේමචන්ද්‍ර)
‘බිත්තර වී’ යන වචනයේ තේරුම නොදැන සිටි කාන්තාවකට පිරිසක් ඉදිරියේ මහත් අපහසුතාවයටත්, ලැජ්ජාවටත් පත්වීමට සිදුවූ බව කියැවෙන රසවත් පුවතකි මේ.

ඇය කොළඹ ප්‍රදේශයේ උපන් කාන්තාවකි. කුරුණෑගල දිස්ත්‍රික්කයේ ගම්මානයක තරුණයෙකු හා විවාහ වී ඇය එම ගම්මානයට පදිංචියට පැමිණියේ මීට මාස කිහිපයකට පෙරය. රූපලාවන්‍ය හා කේක් සෑදීම පිළිබඳ පාඨමාලාවක් හදාරා ඇති අැය එම කටයුතුවල නියැලුනාය. ගමනෙන් බිමනෙන් කළේ නගරබද උපන් කාන්තාවක් බව සමාජයට පෙන්වීමටය. කතා බහ කරනවිට ඉංග්‍රීසි වචන කිහිපයක් එක් කිරීම ඇය කළේ ඒ සඳහාය.

පසුගිය දිනක ගමේ නිවසකින් ඇයට කේක් කිලෝ 5ක් සෑදීම සඳහා ඇණවුමක් ලැබුණ අතර ඒ සඳහා බිත්තර 40ක් පමණ මිලදී ගැනීමට ගමේ වෙළඳසල වෙත ගියද එහි බිත්තර නොතිබුණු නිසා ඇයට හිස් අතින් ආපසු ඒමට සිදුවිය. මේ නිසා ඇය නිවසේ සිට කිලෝ මීටර් 4ක පමණ දුරකින් පිහිටි කුඩා කඩමණ්ඩිය වෙත සිය යතුරුපැදියෙන් ගියේ බිත්තර මිලදී ගැනීම සඳහාය.

එහි වෙළඳසල් දෙක තුනකට ගියද ඒවායේද බිත්තර නොතිබිණි. ආපසු නිවස බලා පිටත්වූ ඇයට සතුටක් ගෙන දුන්නේ එම නගරයේ කෙළවරක ඇති වෙළඳ සලක බිත්තර අලෙවි කිරීම සඳහා ඇති බවට දැන්වීමක් දැකීමෙනි.

එම වෙළඳසල වෙත ගිය ඇයට සිය වාරය එනතෙක් විනාඩි 20ක පමණ කාලයක් එහි රැඳී සිටීමට සිදුවූයේ ඒ වනවිටත් භාණ්ඩ මිලදී ගැනීමට පාරිභෝගිකයන් හත් අට දෙනෙකු එහි සිටි නිසාය.

සිය අවස්ථාව ලැබුණු පසු ඇය මුදලාලි වෙත ගොස් පවසා සිටියේ බිත්තර 40ක් දෙන ලෙසය.

මද සිනහවක්ද පාමින් මුදලාලි ඉතා කාරුණික ලෙස මෙසේ පැවසීය.

‘‘අනේ නෝනා අපේ කඩේ බිත්තර විකුණන්න නෑ. වෙන කඩයක බලන්න’’

‘‘එහෙනම් මොකදට මුදලාලි පොල් ගෙඩි අකුරින් කඩේ ඉස්සරහ බැනර් එකක් දාල තියෙන්නේ ‘‘බිත්තර වී විකිණීමට ඇත’’ කියලා. මම මෙතන විනාඩි 20ක් විතර රස්තියාදු වුණා’’ ඇය තරමක කෝපයෙන් උස් හඬින් පැවසූයේ එහි සිටි අනික් පිරිසටද ඇසෙන ලෙසය.
අනේ නෝනා ‘‘බිත්තර වී’’ කියන්නෙ පැළ කරන්න ගන්න වී වලට ඒවා නම් කඩේ විකුණන්න තියෙනවා.

මුදලාලිගේ ප්‍රකාශයෙන් ලැජ්ජාවටත් අපහසුතාවයටත් පත් කාන්තාව එම ස්ථානයෙන් වහා පිටව ගියේ එහි රැස්ව සිටි අනික් පිරිසගේ මුහුණ දෙසවත් නොබලාය.