(කරන්දෙණිය එම්. සුසිල් ප්‍රියන්ත)
තමා හමුවට එන කෙනා ගැන නොදැන කළ කතා බහෙන් අලි අමාරුවක වැටුණු මහජන නියෝජිතයකු ගැන දකුණෙන් අසන්නට ලැබුණි.

මහජන නියෝජිතයාගෙන් ආයතනයක ප්‍රධානියකුට ලැබුණේ අණකි. ඒ තමා වහාම හමුවන ලෙසය. ඔහු හමුවන්නට තමාට එන්න යයි කියන්නේ නිකමට නොවන බව දැනගත් ආයතන ප්‍රධානියා මේ සම්බන්ධයෙන් සිටියේ දැඩි සැකයකිනි. ඒ ගමන යාමට දැඩි බියකිනි. මේ මොන මරාලයක් දැයි සිතුණි.

 ඔහුගේ බිය නැති කොට ඔහු සමග මහජන නියෝජිතයා හමුවීමට යාමට කාර්යාලයේ වඩාත්ම කැපී පෙනෙන සේවකයා ඉදිරිපත්වූයේ මේ අතරය.

දෙදෙනාම ඔහු ඉදිරියේය. වාඩිවෙන්න යයි විධානය නිකුත් වූයේය. ආයතන ප්‍රධානියා අසුන් ගත්තේ මහජන නියෝජිතයට ලම්භකවය. සේවකයා ඊට යාබදය.

‘‘මම තමුසෙට එන්න කීවේ වැදගත් කාරණාවකට’’ ඒ ඇසුණු සැනින් ‘‘මොකක්ද සර්’’ ඔහු කීවා නොව කියවුණේය. තමුසෙගේ ආයතනයේ ඉන්නවා අපේ රජයට විරුද්ධව වැඩකරන ඒ වගේම මාවත් තැන තැන විවේචනය කරන එකෙක්. උගේ නම තමයි අසවලා. තමුසේ එක්කෝ ඌව හදා ගන්න ඕන. නැත්නම් ඌව ඔතනින් දුරකට මාරු කරලා යවන්න ඕනෑ. හැබැයි මට ඕකාව අහුවුනොතින් කම්බස් කරනවා යයි මහජන නියෝජිතයා ආයතන ප්‍රධානියාට කියාගෙන කියාගෙන ගියේය.

යමකුට ආයතනයක් තුළ රජය විවේචනය කරන්න දෙන්න බැහැ නේද මහත්තයා යයි මහජන නියෝජිතයා ආයතන ප්‍රධානියා සමග පැමිණි සේවකයාගෙන් ද ඇසුවේය. ඔහු කිසිම වදනක් නොකියා යාන්තමට සිනා සුනා පමණි.

මේ සිදුවීම සිදුවී ගතවූයේ දින කිහිපයකි. ආයතන ප්‍රධානියාගේ ආරාධනයෙන් මහජන නියෝජිතයා මේ ආයතනයට එන්නේ උත්සවයක ආරාධිත අමුත්තා ලෙසය. උත්සවය යද්දීම තමාගේ උදහසට ලක්ව සිටි සේවකයා කවුදැයි යන්න පෙන්වන ලෙස ආයතන ප්‍රධානියාට කීවේය. ඒ සමගම මේ උත්සවය වෙනුවෙන් දැඩි කැපවීමක් කටයුතු කරමින් සිටි සේවකයකු ආයතන ප්‍රධානියා ඔහුට පෙන්නුවේය.

මහජන නියෝජිතයාට තරු පෙණුනේ එවිටය. ඔහු කවුදැයි යන්න නොදැන ගෝරනාඩු කර ඇත්තේ එදා තමා සම්මුඛ ව සිටි ඔහු බව පසක්වූ විට මහජන නියෝජිතයා ආයතන ප්‍රධානියාට කෑගැසුවේ මොකද එදා තමුසේ අර මිනිහා මට හඳුන්වා දුන්නේ නැත්තේ යයි කියමිනි.

‘‘සර් ඉතිං එදා ඇහැව්වේ නැහැනේ මේ කවුද කියලා. එහෙම ඇහුවානම් ඉතිං කියන්න තිබුණා යයි ඔහු කීවේය. මේකත් හොඳ පාඩමක් යයි මහජන නියෝජිතයා තමාටම කියා ගත්තේලු‍.