• කරන්දෙණිය-එම්. සුසිල් ප්‍රියන්ත

රෑට වේළෙන්න වැලට දාන යට ඇඳුම් සොරකම් කරන තැනැත්තා අල්ලා ගැනීමට අපූරු උපක්‍රමයක් භාවිත කළ නිවැසියන් පිරිසක් පිළිබඳ කතාවක් දකුණේ ගම්මානයකින් අසන්නට ලැබේ.

මේ නිවෙසේ තරුණ දූදරුවෝ තිදෙනෙක් විසූහ. දූවරුන් තිදෙනකු වැදුව ද මවගේද තරුණකම පොඩ්ඩක්වත් අඩු වී නොතිබුණාය. ඒ නිසා දූවරුන් තිදෙනා මෙන්ම මවද රෑ කාලයේ යට ඇඳුම් සෝදා වේළෙන්න දමන්නේ එළිමහනේ වැලටය. වැලට දමන යට ඇඳුම් කාලයක පටන්ම අස්ථානගත විය. බැරිවෙලාවත් එළියෙ වැලේ වනා තිබූ කාන්තා යට ඇඳුම් රෑට ගැනීමට අමතක වුවහොත් ඒවා පසුදාට අතුරුදන්ය.

මේ නිසා මේ අම්මලා, දූලාට අවශ්‍ය වූයේ මේ සොරකම නතර කර ගැනීමත් ඒවා සොරකම් කරන සොරා අල්ලා ගැනීමත්ය. ඒ අරමුණින් ඔවුහු ඉතා පහසු උප්පරවැට්ටියක් යෙදුහ. ඒ සඳහා තමන් භාවිතයෙන් ඉවත් කරන ලද කාන්තා යට ඇඳුම් කිහිපයක් එදා රෑ වැලේ තැබුවේ වෙනදාමෙන් ඒවා ගැනීමට අමතක වී ගියාසේය.

ආයි, ඌයි, අම්මෝයි, කියා නිවෙසේ පැත්තකින් ගැට ගසා තිබූ රෙදි වැලෙන් කෑගැසිල්ලක් ඇසුණේ මධ්‍යම රාත්‍රිය ආසන්න වෙද්දීමය.

හනිහනිකට විදුලි පහන් දමා දොර හැර බලන විට දක්නට ලැබුණේ කොර ගසමින් බොහෝ අපහසුවෙන් දුවන අසල්වැසි තරුණයෙකි. ඔහුගේ නම කියා නිවැසියන් කතා කළේ ඔහු හඳුනා ගත් බව පෙන්වීමටය.

අම්මා දැන් වැඩේ හරිනේ දැන් ගිහින් නිදාගමු ආයෙත් ඉතින් රෑට රෙදි වැලේ තියෙන යට ඇඳුම් නැතිවෙන එකක් නැහැ, රෙදි වැල දිගට දාපු උගුරැස්ස සහ දෙහි කටු උදේටම අස්කරමු ඒ එක්කම ඇඳුම් අස්සට දාල තිබුණ දිමි ගොටු ටිකත් අයින් කරමු යයි දූවරුන් අම්මාට කියද්දී ඔවුන් කාලයක් තිස්සේ පීඩාවකින් සිටි දෙයක් නැත්තටම නැතිවූවා යයි සිතමින් ළය සැහැල්ලු‍ කරගෙන නින්දට ගියාලු‍.