(පොල්ගස්ඕවිට - එස්. වික්‍රමආරච්චි)

කොවිඩ් වසංගතය සෙමින් තුරන් වී යාමත් සමග දිනෙන් දින කල්ගිය විවාහ මංගල උත්සව සුදානම් කෙරෙමින් පවතී. විවාහ මංගල උත්සව වලට ඇරියුම් ලැබෙන්නේ සීමිත ආරාධිතයන්ට පමණක් වන හෙයින් ලැබෙන ආරාධනා වලට සහභාගිවීමද අනිවාර්යය.

 සුමනසිරි රජයේ සේවකයෙකි. ඔහුටද සමීපතම ඥාතියකුගේ විවාහ මංගල උත්සවයට ආරාධනා ලැබිණි.

අනිවාර් යෙන්ම එන්න ඕනෑ. නැකතට පොල් ගෙඩිය බිඳින්න ඕනෑ ඔයා. ඥාතියා කීවේය.

‘අනිවාර් යෙන්ම වෙලාවට එනවා’ සුමනසිරි කිවේය.

මෙම ආරාධනාව මෙම  මාසය තුළ ඔහුට ලැබුණු හතරවැනි ආරාධනාව වේ. අලුත් ඇඳුම් පැළඳුම් ගැනීමට සිදුවීම මෙන්ම තෑගි බෝග දීමට මුදල් වියදම් කිරීම නිසා ඔහු හොඳටම හෙම්බත්ව සිටියේය.

ඥාතියාගේ මංගල උත්සවයට පෙර දිනද කාර්යාලයේ මිතුරකුගේ විවාහ මංගල උත්සවය  තිබිණි.

‘‘ඒකට ඇඳගෙන ගිය ඇඳුමම ඇඳගෙන යනවා.’’ සුමනසිරි සිතුවේය.

 මිතුරාගේ විවාහ උත්සවයට සහභාගිවී පැමිණ කමිසය ගලවා සාලයේ පුටු සැටිය මතින් තැබුවේ දහදිය වේළීමටත් එක්කය. පසුදා උදෑසන අවදිවී බලන විට සුමනසිරි දුටුවේ කමිසය මත කවුරුන් හෝ වාඩිවී සිට ඇති බවය. ඇඳගෙන යාමටත් නොහැකි තරමට කමිසය පොඩිවි තිබිණි.

 කමිසය මැද ගැනීමට ඔහු කාමරයට ගියේය. විදුලිය විසන්දි කර ඇති බව ඔහු දැන ගත්තේ එවිටය. සොයා බැලීමේදි දැන ගැනීමට ලැබුණේ අලුත්වැඩියාවක් සඳහා එදින සවස්වනතුරුම විදුලිය විසන්ධි කර ඇති බවය.

 ‘‘දෙයියෝ සාක්කි මොකද කරන්නේ’’ සුමනසිරි කල්පනා කරන්නට පටන් ගත්තේය. කිලෝ මීටර් පහක් පමණ ඈතින් සිටින මිතුරකු ඔහුට සිහිපත් විය. සුමනසිරි ඔහුට ඇමතුමක් ගත්තේය.

‘මෙහෙ ලයිට් තියෙනවා වරෙන්’ මිතුරා කීවේය.

 පොඩි වූ කමිසයද රැගෙන සුමනසිරි යතුරුපැදියෙන් පිඹගෙන ගියේය.

කමිසය මැද ගැනීමෙන් පසුව මිතුරා වැඩි ආරක්ෂාවට කමිසය රඳවනයක (හැන්ගර් එකක) දමා දුන්නේය. 

විවාහ මංගල උත්සවය තිබෙන්නේ කිලෝ මීටර 30ක පමණ දුරය. නැකතට පොල් ගෙඩිය බිඳිය යුත්තෙත් සුමනසිරිය. නැකතට වැඩි වේලාවක්ද නැත. ඔහු කමිසය ගෙන පිම්මේ ගෙදර අාවේය.

ගෙදර ඇවිත් බලනවිට යතුරුපැදියේ තිබුණේ ඇඳුම රැඳවූ හැන්ගර් එක පමණි. කමිසය නැත. එය මග වැටී ඇත. කෝකටත් කියා සුමනසිරි ආ මග  ඔස්සේ ගියේය. අතරමගදී ඔහු දුටුවේ කමිසය මග වැටී ඇති බවය. ඒ මතින් වාහන ගොස් තිබිණි. එය ඇඳීමට ගත නොහැකිය. ගෙදර ගිය සුමනසිරි පරණ ඇඳුමක් ඇඳගෙන නැකතට විනාඩි පහකට කලින් උත්සව ශාලාව වෙත ගියේය.

මේ මොකෝ ඇඳුම දෙස බලා සමහරු ප්‍රශ්න කරන්නට වූහ.

එනපොට හොඳ නැති බව දැනගත් සුමනසිරි නොකා නොබී එතැනින් මාරු විය.