(වියලු‍ව වාර්තාකරු) 
   මංගල උත්සවය නිමාවට පත්ව මංගල රාත්‍රිය ගත කිරීම සඳහා සිය නිවෙසට පැමිණෙන මංගල යුවළ වෙනුවෙන් සකස් කර තිබූ සයනය, පදම ඉක්මවූ ඥාතියකු විසින් කල්තබාම අත්පත් කර ගැනීම හේතුවෙන් මංගල යුවළට අසල්වැසි නිවෙසක රාත්‍රිය ගත කිරීමට වීමේ සිද්ධියක් පසුගියදා වාර්තාවිය.

 එය ගම්බද නිවසකි. වියදම් කරන්නට තරම් ලොකු මුදලක් නැතත් පැරැණි චාරිත්‍ර වාරිත්‍රවලට මුල් තැන දුන් දෙපාර්ශ්වයේ ඥාතීන් සිය දරුවන් දෙදෙනා විවාහ කරවනු ලැබුවේ නිවෙස්වල පවත්වනු ලැබූ චාම් උත්සවයකිනි.

මනාලියගේ නිවෙසේ උත්සවය අවසානයේ මනමාල මහතා මනාලිය සිය නිවසට කැඳවාගෙන එනු ලැබූ අතර නිවැසියන් සිය දරුවා ගේ මංගල රාත්‍රිය ගත කිරීම් සඳහා නිවසේ තිබූ එකම කාමරය හැකි අයුරින් සරසා සකස් කළේ ඒ වෙනුවෙන් ඇවැසි උපරිම පහසුකම් ද ලබා දෙමිනි.

 එහෙත් මංගල යුවළත් සමඟම පැමිණි මනමාල මහතාගේ   වැඩිහිටි ඥාතියෙකු කල්තබාම එම කාමරයට ඇතුළු වී කීප පොළකම වමනය කර මනාල යුවළ වෙනුවෙන් සුදු පිරුවට අතුරා සකස් කර තිබූ සයනයේ වැතිරුණේ ඔහු වැළැක්වීමට පැමිණී කීප දෙනකුටම ලු‍ණු ඇඹුල් ඇතිව බැණ වදිමිනි.

පිටස්තර ප්‍රදේශයකින් තම පවුල්ට කැඳවාගෙන ආ ලේලියගේත් තම දරුවාගේත් මංගල දිනය වෙනුවෙන් සකස් කර තිබූ නිවසේ වූ එකම කාමරය මෙසේ අහිමි වෙද්දී නිවැසියන් මෙන්ම මනාල මහතාද දැඩි අපහසුතාවකට විය.

 කාමරයෙන් පිටවූ දැඩි දුර්ගන්ධය හේතුවෙන් කිසිවෙකුත් එහි ඇතුළුවීමද ප්‍රතික්ෂේප කළහ.

අවසානයේ මනමාල මහතාගේ නිවෙසේ තිබූ චාම් උත්සවය නිමාකළ මනාල යුවළ කුලියට ගත් ත්‍රීවිල් රථයකින් දුර බැහැර පිහිටි සිය මවගේ ඥාතියකුගේ නිවෙසකට ගොස් සිය මංගල රාත්‍රිය ආරම්භ කරන විට මැදියම් රාත්‍රියද ඉක්ම ගොස් තිබිණි.

මේ වන විට කාමරය අරක්ගත් ඥාතියා පමණක් නොව ඔහුගේ බිරින්දෑද මේ පවුලට මුහුණ නොදී මග හරින බව ගම්මු කියති.