දිගු කලක සිට පැවති ආදර සබඳතාවක් බිඳ වැටීම නිසා දැඩි කලකිරීමට පත්ව සිටි ඔහු සේවය කළේ අගනුවර සෞඛ්‍යයට සම්බන්ධ සේවා ආයතනයක ය. පසුගිය දා ස්ථාන මාරුවක් ලැබ එහි පැමිණි තරුණ ලිපිකාරිනියක නිසා ඔහුගේ මියැදුණු සිතිවිලි යළි අවදි විය. සිනාවෙන් කතාවෙන් දිගු ගමනකට යා හැකි යැයි සිතූ ඔහු බලාපොරොත්තු ඇති කර ගත්තත් දිගු නිවාඩුවකට පසු අපේ‍්‍රල් පළමුවැනිදා තමාට නොදන්වා ඇය සේවයට නොපැමිණීම ඔහුගේ සංවේගයට හේතු විය. මේ ගැන විමසූවිට හිතවතකු කීවේ ‘‘අද එයාගෙ ගෙදර පාටියක්. දන්නේ නැද්ද?’’ කියාය. ඔහු තිගැස්සිණ ‘‘එයාගෙ උපන්දිනේ බං. උඹත් කෝල් එකක් දීල සුබ පතපන්.’’
ඔහු ක්‍ෂණිකව දුරකතන ඇමතුමක් ගෙන සුබ පැතුවත් මොහොතකින් එය විසන්ධි විය. පසුව ඔහුට තේරුම් ගියේ අපේ‍්‍රල් පළමුවැනිදා යහළුවා තමාට ලණුවක් දී ඇති බවය. කෙසේ වෙතත් ඇය පසුවදා සේවයට ආ පසු ඔහුගේ මුහුණවත් බලන්නේ නැතිලූ.