මොරගොල්ලාගම සිසිර කැලේගම

මිතුරු කැලගේ මුසා බස්වලට රැවටී වාචාලකම් දොඩන්නට ගිය සේවකයකුට වහාම විනය පරික්ෂණයක් සදහා පෙනී සිටීමට සිදු වු සිද්ධියක් හස්තිශෛලපුරවරයෙන් අසන්නට ලැබෙයි.
සිද්ධිය සැකෙවින් මෙසේය.
කුලියට වාහන දෙන රටේ සංවර්ධනයට දායකත්වය ලබා දෙන රාජ්‍ය ආයතනයකට අනුබද්ධිත ආයතනයකි.
විවිධ පෙදෙස්වලින් සේවයට පැමිණෙන උදවිය වෙති. දුර බැහැර අයට සතියේ දිනවල දිනපතා සේවයට පැමිණීම අපහසුය. මේ නිසා පිරිසක් එහි ඇතුළත හා අවට බෝඩිම්වල නැවතී සති අන්තයේ ගෙවල් බලා නික්ම ගියහ.
ලැබෙන්නට නියමිත අතිකාල දීමනා පමා වී ඇත. එය කෙසේ හෝ ඉවසා දරා සිටි සේවකයිනට මාසික වැටුපද නියමිත දිනට නොලැබුණු නිසා එහි ඇති වූවේ නොසන්සුන්තාවකි.
බෝඩිමේ පිරිස් හා ඇතුළත නැවතී සිටින අය එකට එක් වූහ.
පඩි නැතත් මත් වතුර තොල ගෑමට එක් වූහ. ආයතනයේ බොසාට එක එකා දොස් නැගූහ.

ඒ අතරේ එකෙක් කෝල් එකක් ගත්තේය.ඔහු නොනවත්වා බැන ගෙන බැනගෙන ගියේය. සියලු‍ දෙනා ඇස් කන් අයාගෙන ඒ දෙස බලා සිටිති. ටික වේලාවකට පසුව සංවාදය නිමා වුණි.
‘‘අපේ මේකා ඒ බැන්නේ කොළඹ හෙඩ් ඔපිස් එකේ ලොක්කාට. ලොක්කාගේ දත කට පූට්ටු වෙලා අවසානයේ ලොක්කාම බැරිම තැන පෝන් එක කට් කෙරුවා. අන්න කොල්ලෝ. තොපි මහ ලොකු වෘත්තිය සමිති නායකයෝ. තොපි වාගේ එවුන් පොල්පිත්තෙන් කපන්න පුළුවන්. තොපි හැමදාම ලොක්කන්ට ගොට්ට අල්ලපියව්”‍ සේවක පිරිස දුර කථනයෙන් කතා කරමින් දොස් කියූ අය වටකරගෙන වෘත්තිය සමිති නායකයෙකුට දෙහි කැපූහ.
පදම ඉක්මවා සිටි ඔහුට ද මළ පැන්නේය. ඔහුත් කෝල් එකක් ගත්තේය.
”‍හෙලෝ, ඩී.ජී.එම් ද? සර්ලා කොල්ලන්ට පඩි දෙන්නේ නෑ. වෘත්තිය සමිති නායකයෝ හින්දා අපිත් බැණුම් අහනවා. මේවා විසදන්න බැරිනම් ඔය පුටුව දාලා යන්න. අපිට පව් නොදී”‍”‍ ඔහුත් අනෙකා පරයන ලෙසට බැණ වැදුණේය.
පසු දින ඔහුට දුර කතන ඇමතුමකි.
”‍තමුසේ ඊයේ රෑ පදමට වෙරි වෙලා කාටද බැන්නේ. වහාම කොළඹට එනවා. ඇවිදින් කතා කරමු”‍
ඔහුට තරු පෙනුණේය. අනිත් සගයා ලොක්කාට කියා බැන ඇත්තේ හිතවතෙකුටය. නමුත් එයට සවන් දුන් මොහු ගොනාට අන්දවා ඇති බව වටහා ගත්තේය. වෙච්ව වැරැද්දට සමාව ගන්නට කියා හෙතෙම ආයතනයෙන් නික්ම ගියේ තම ඇසුරේ සිට තමන්ටම වළ කැපූ මිතුරන්ට දෙස් දෙවොල් තබමින්ලු‍.