(කටුගස්තොට-ධම්මික ගුණවර්ධන)

නිවසට ගොස් ලබන සංග්‍රහය අතරමගදී භුක්තිවිඳීමට ගොස් ඇති වූ ජංජාලයක් විසඳීමට පොලිසියට ද මැදිහත්වීමට සිදුවීමේ පුවතක් කටුගස්තොට නගරාසන්න ප්‍රදේශයකින් වාර්තා විය.

වාර්තා වන අන්දමට සිදු වී ඇති සිද්ධිය සැකෙවින් මෙසේය. ගාලු පුරවරේ සිටින ඔහුගේ හොඳම මිතුරා ඉකුත්දා මහනුවර පල්ලේකැලේ පැවැති ටෙස්ට් ක්‍රිකට් තරගය නැරඹීම සඳහා මහනුවරට පැමිණියේ දුම්රියෙනි. එසේ පැමිණි ගාලු මිතුරා කැඳවාගෙන යාමට තම ත්‍රිරෝද රියෙන් පැමිණි නුවර මිතුරා ඔහු කැටුව යන අතරවාරයේදී පොඩි අඩියක් ද ගසා ඇත්තේ නිවසේදී ඒ සඳහා අවකාශ නොමැතිවීම නිසාය. මෙසේ යන අතරතුර ගාලු මිතුරාට සංග්‍රහ කිරීමට අවශ්‍ය කළමනා ගැනීමට නුවර මිතුරා ත්‍රිරෝද රියෙන් බැස ගියේ ටිකක් වැඩි වී සිටි ගාලු මිතුරාට එහිම රැඳී සිටින ලෙසට උපදෙස් ද දෙමිනි.

කෙසේ නමුත් එසේ සිටි ගාලු මිතුරා ටිකක් අවට සිරි නැරඹීමට ඔබමොබ ගොස් නැවත ත්‍රිරෝද රියට ගොඩවුණේ නුවර මිතුරාගේ ඉක්මන් පැමිධෑම බලාපොරොත්තුවෙනි. ඒ වනවිටත් නුවර මිතුරා එළවළු, පලතුරු, හාල්, තුනපහ පමණක් නොව පුංචි පහේ කේක් ගෙඩියක් ද එහි රැගෙනවිත් තැබීම පිළිබඳව අතිශයින්ම සතුටු වූ ගාලු මිතුරා තමන් වෙනුවෙන් සිදුකරන සංග්‍රහ කොහේ සිට භුක්ති වින්දත් කමක් නැතැයි කියා කේක් ගෙඩිය කෑමට පටන් ගත්තේ නුවර මිතුරාගේ ආගන්තුක සත්කාරය ගැන සිහිකරමින්මය.

මේ අතර හදිසියේ එහි රියැදුරු අසුනට නැග ගත් නාඳුනන කාන්තාවක් හොරෙක් හොරෙක් යැයි කෑ ගැසීමත් සමගම ඒ අවට පිරිස් ත්‍රිරෝද රිය වටකර ගත් අතර ඒ ආසන්න රාජකාරියේ නියුතුව සිටි පොලිස් නිලධාරීන් දෙදෙනකු ද වහා ඒ දෙසට දුව ආවේ නීතිය ක්‍රියාත්මක කිරීමේ අරමුණෙනි. මේ වනවිට තම ගාලු මිතුරාගේ හදිස්සි අතුරුදන්වීම පිළිබඳව කලබල වී සිටි නුවර මිතුරාට දැනගැනීමට හැකිව ඇත්තේ තම මිතුරා අඩක් කෑ කේක් ගෙඩියක් අතැතිව නාදුනන ත්‍රිරෝද රියක් අසල මිනිසුන්ගේ ග්‍රහණයට හසුව සිටින අයුරුයි. කෙසේ නමුත් පසුව තම මිතුරාට ත්‍රිරෝද රිය මාරු වී මේ අකරතැබ්බය වී ඇති බවට කරුණු කාරණා පහදා දී ගුටි නොකා ගාලු මිතුරා නිවෙසට කඳවා ගිය බව වැඩිදුරටත් වාර්තා විය.