• ඇල්පිටිය චන්ද්‍රසිරි ගුණසේකර

සිල්ලර වෙළෙඳසලකට ගිය තරුණයකු එහි සිටි තරුණියකට ඉක්මනට බිත්තර දහයක් දමා දෙන්නැයි කියූවිට ඇය එම තරුණයාගේ ඇඟට ගොඩවීමේ සිද්ධියක් ගාලු‍ දිස්ත්‍රික්කයේ නගරයකින් වාර්තාවේ.

වාර්තා වන අන්දමට සිද්ධිය මෙසේය.
මේ දිනවල පවතින බිත්තර හිඟය නිසා බොහෝ වෙළෙඳසල්වල බිත්තර විකිණීමට නැත. කඩයක දෙකක බිත්තර විකිණීමට ඇතත් ඒවාත් විකුණන්නේ හොර රහසේය.

හොර බිත්තර විකුණන කඩයකට ගිය තරුණයෙක් එහි සිටි වෙළෙඳ සේවිකාවකට කතා කර මට ඉක්මනට බිත්තර දහයක් දමා දෙන්නැයි ඉල්ලා සිටියේය. ඒ ඔහුගේ පෙම්වතිය ලබාගත් කේක් ඇණවුමක් සඳහා පාවිච්චි කිරීමටය. පියකරු වුවද කඩිසර තරුණියක නොවූ ඇය හෙමි හෙමිහිට කවරයකට බිත්තර දමමින් සිටියාය. 

තරුණයා ඇය අසලට ගොස් ඉක්මනට බිත්තර දහයක් දමා දෙන්නැයි තරුණියට කියා සිටියේ පෙම්වතිය පෙරමග බලා සිටිනා බව දන්නා නිසාය. එවිට තරුණිය තරුණයා දෙස ටිකක් රවා බැලූවිට කෙකරගගා ඉන්නෙ නැතුව මට ඉක්මනට බිත්තර දහයක් දාල දෙනවකො යැයි ටිකක් ශබ්දයෙන් කීවේය.

මෙයින් ලජ්ජාවට පත් තරුණියට යකා නැග්ගේය. 

‘‘හිතුවද මම කිකිළියෙක් කියල. ඔයාට හරියන කිකිළියෙක් සොයල බිත්තර දම්මව ගන්නව.”‍ යනුවෙන් කියූ ඇය බිත්තර දමමින් සිටි කවරය බිත්තර පෙට්ටිය උඩ තබා කඩය තුළට යන්නට ගියාය.
ලජ්ජාවට පත් තරුණයාද බිත්තර නොගෙනම එළියට බැස ගියේය. ‘‘කොහොමද බිත්තර දම්මවා ගත්තැදැයි මිතුරන් අසනවිට දැන් ඔහුටත් තදවෙනවාලු‍.