ගෝලීය සෞඛ්‍ය අර්බුදයක් සහ ආර්ථික අර්බුදයක් නිර්මාණය කර ඇති ‘කොවිඩ්-19’ හෙවත් නව කොරෝනා වයිරසයේ හේතුවෙන් ලොවපුරා මියගිය ගණන 166,000 ඉක්මවා ගියේය.

අද (20) පස්වරු 6 වනවිට ලොව නන්දෙසින් වාර්තා වූ කොරෝනා මරණ ගණන 166,045ක් ලෙස දැක්විණි.
ලොවපුරා කොරෝනා ආසාදිතයන්ගේ ගණන 2,423,504කි.

ලොවපුරා සමස්ත කොරෝනා මරණවලින් හතරෙන් එකක් වාර්තා වන්නේ ඇමෙරිකා එක්සත් ජනපදයෙනි. ලොවපුරා කොරෝනා ආසාදිතයන්ගේ සංඛ්‍යාවෙන් තුනෙන් එකක් වාර්තා වන්නේ ද ඇමෙරිකා එක්සත් ජනපදයෙනි.

එක්සත් රාජධානියෙන් වාර්තා වන කොරෝනා ආසාදිතයන්ගේ ගණන 121,000 ඉක්මවා ගොස් ඇති අතර එරටින් වාර්තා වන මරණ ගණන 16,000 ඉක්මවා ගොස් ඇත.

දෙවැනියට වැඩිම කොරෝනා ආසාදිතයන් ගණනක් වාර්තා වන්නේ ස්පාඤ්ඤයෙනි. එරටින් වාර්තා වන සමස්ත කොරෝනා ආසාදිතයන්ගේ ගණන 200,210ක් වන අතර එරටින් වාර්තා වන මරණ ගණන 20,852කි. ඉතාලියෙන් වාර්තා වන කොරෝනා ආසාදිතයන්ගේ ගණන 178,972ක් වන අතර එරටින් වාර්තා වන මරණ ගණන 23,660කි.


විදෙස් වාර්තා ඇසුරිනි

055