(ජේ.කේ.එල් චාමින්ද)

දකුණු පළාත්  සෞඛ්‍ය අමාත්‍යංශය  මගින් පාලනය වන රෝහල් වල සායනිකව ප්‍රතිකාර ගන්නා රෝගීන්ගෙන් සියයට 50 කට වඩා වැඩි පිරිසකට මේ වනවිට ඖෂධ බෙදා දීමට කටයුතු කර ඇති බව  දකුණු පළාත් සෞඛ්‍ය සේවා අධ්‍යක්ෂක විශේෂඥ වෛද්‍ය චන්දිම සිරිතුංග මහතා පවසයි.

දකුණු පළාත් සෞඛ්‍ය අමාත්‍යංශයට අයත් ග්‍රාමීය , ප්‍රාදේශීය  රෝහල් මෙන්ම ප්‍රාථමික සත්කාරක ඒකක මගින් සායනික රෝගින්ට ඖෂධ නිවෙස්වලට යැවීමට කටයුතු කර ඇති බව දකුණු පළාත් සෞඛ්‍ය සේවා අධ්‍යක්ෂකවරයා සඳහන් කළේය.

ඇතැම් ප්‍රාදේශීය රෝහල් මගින් සියයට 90 ඉක්මවා සායනික රොගීන් සඳහා ඖෂධ නිකුත්කර  ඇති බවද හෙතෙම පවසයි.

මේ පිළිබද අදහස් දක්වමින් පළාත් සෞඛ්‍ය සේවා අධ්‍යක්ෂකවරයා මෙසේද කිවේය.

‍         ‘‘උඩුගම ,වලස්මුල්ල වැනි රෝහල් මගින් සියයට 90 ක් පමණ ඉක්මවා සායනික රෝගින්ට ඖෂධ නිකුත් කරලා තියෙනවා.

බලපිටිය ඇල්පිටිය වැනි රෝහල්වලත් සියයට 50 ඉක්මවා සායනික රොගීන්ට ඖෂධ නිවෙස්වලට යැවීමට කටයුතු කර තියෙනවා. කුඩා රෝහල්වලට පැමිණ ඇතැම් සායනික රෝගීන්  ඖෂධ රැගෙන ගොස් තියෙනවා.

එවැනි රෝගීන්ද සියයට 25 ක් විතර ඉන්නවා. ඇඳිරි නීතිය නිසා  පසුගිය සති තුනේ සායනවලට එමට නොහැකි වූ රෝගින් සංඛ්‍යාවක් ඉන්නවා. ඒ රෝගීන්ගෙන් සියයට පනහකට වඩා   වැඩි රෝගීන්ට තැපල් මාර්ගයෙන්, සෞඛ්‍ය කාර්යමණ්ඩල මගින්  ග්‍රාම නිලධාරින් හරහා විවිධ ක්‍රම උපයෝගි කරමින් එම රෝගින්ගේ නිවෙස්වලටම ගොස් ඖෂධ බෙදාහැරීමට කටයුතු කරලා තියෙනවා.‘‘

දකුණු පළාත තුල මෙම වැඩපිළිවෙළ ඉතා සාර්ථකව ක්‍රියාත්මක වන බවද පළාත් සෞඛ්‍ය සේවා අධ්‍යක්ෂකවරයා සඳහන් කළේය.